Каля Беларускай каталіцкай місіі ў Лёндане адкрылася выстава да 30-годзьдзя аварыі на Чарнобыльскай АЭС. Яна праходзіць у межах Лёнданскага фэстывалю архітэктуры.
16-мэтровы тунэль-інсталяцыю зрабіла архітэктурнае бюро Spheron Architechts пад кіраўніцтвам Цзыўая Со. Тунэль перадае атмасфэру, у якой працавалі ратаўнікі-шахцёры пасьля аварыі на Чарнобыльскай АЭС. Каб дабрацца да рэактару з-пад зямлі, 10 тысяч савецкіх шахцёраў выкапалі 150-мэтровы тунэль. 2,5 тысячы з тых шахцёраў памерлі, не дажыўшы да 40 год.
У імправізаваным тунэлі каля Беларускай каталіцкай місіі праходзіць выстава Аляксандра Трафіменкі. Родам зь вёскі Карма-Пайкі Краснапольскага раёна — разам зь сям’ёй ён быў вымушаны пераехаць ва Ўкраіну пасьля адсяленьня вёскі.
Таксама тут прадстаўленыя фатаграфіі Юрыя Міхеда і Лінды Ўолкер. У цэнтры выставы стаіць мадэль беларускай драўлянай царквы Сьвятога Кірылы Тураўскага. Адначасова гэтая царква зьяўляецца храмам-помнікам ахвярам Чарнобыльскай аварыі за мяжой.
Як распавёў Свабодзе Цзыўай Со, сёлета гэта адзіная ў Брытаніі выстава, прысьвечаная Чарнобыльскай аварыі ў кантэксьце Беларусі. А таму ў Spheron Architechts вырашылі прадставіць на Лёнданскім фэстывалі архітэктуры ня тыя праекты, што яны ўжо выканалі, а стварыць адмысловую пляцоўку пра Чарнобыль і Беларусь.
«Мы пастанавілі заняцца гэтым, каб распавесьці жыхарам Лёндану пра Чанробыльскую аварыю, — сказаў Цзыўай. — Напрыклад пра тое, што 60-70% радыеактыўных ападкаў выпалі на тэрыторыю Беларусі».
Выстава-тунэль задумвалася як часовая. Яна будзе адкрытай увесь чэрвень у выходныя з 14 да 17-й гадзіны.
«Мы плянавалі прыбраць выставу пасьля закрыцьця фэстывалю, — кажа Цзыўай. — Аднак, калі мы атрымаем добрыя водгукі, магчыма, працягнем яе на месяц ці два».
Паводле словаў архітэктара, фэстываль архітэктуры — добрая магчымасьць нагадаць пра Беларусь у брытанскіх мэдыях. Толькі апошнім часам Беларусь сталі ўсё часьцей згадваць у Брытаніі. Найперш, дзякуючы Нобэлеўскай прэміі Сьвятланы Алексіевіч.
«Дзякуючы Алексіевіч людзі пачынаюць успрымаць Беларусь як краіну, якае дае сьвету адных з найлепшых пісьменьнікаў і мастакоў, — кажа Цзыўай. — Цяпер зьявілася нагода гаварыць пра культурнае багацьце, літаратуру і архітэктуру Беларусі, а ня толькі пра палітыку».
