Лінкі ўнівэрсальнага доступу

За заклік да ўдзелу ў Дні Волі слуцкі актывіст Віталь Амяльковіч аштрафаваны на 15 базавых велічынь


Кіраўнік слуцкай арганізацыі партыі БНФ Віталь Амяльковіч

29 сакавіка Слуцкі раённы суд разгледзеў адміністратыўную справу абласнога каардынатара руху «За свабоду» Віталя Амяльковіча, абвінавачанага па частцы 1 артыкула 23.34 КаАП (заклік на несанкцыянаванае мерапрыемства).

24 сакавіка, напярэдадні Дня Волі, случака затрымалі а 18 гадзіне ў цэнтры Слуцку. Пасьля ператрусу ў кватэры яго абвінавацілі ў закліку на несанкцыянаванае мерапрыемства (ч.1 23.34 КаАП) за разьмяшчэньне ў сацыяльнай сетцы «Ўкантакце» малюнка і тэксту пра Дзень Волі.

Судовае паседжаньне адбылося без удзелу самога актывіста. Віталь Амяльковіч прасіў суд перанесьці судовае паседжаньне на наступны дзень у сувязі з асабістымі абставінамі. У залі прысутнічала група людзей, якія прыйшлі маральна падтрымаць актывіста.

— Судзьдзя Аляксандар Тарасюк зачытаў заяву Амяльковіча аб пераносе разгляду справы на іншы дзень, а пасьля абвясьціў перапынак на 30 хвілін, — кажа Марына Дамарад, якая прысутнічала ў залі. — Потым сакратар суду праінфармавала судзьдзю, што ў перапынку яна вывучала інфармацыю пра магчымыя ўважлівыя прычыны адсутнасьці ў судзе Амяльковіча (тэлефанавала ў паліклініку, у іншыя ўстановы) і ня мае такой інфармацыі. Судзьдзя Тарасюк працягнуў судовы працэс, агучыў матэрыялы справы. Ніякіх сьведак, у тым ліку міліцыянтаў, якія затрымлівалі грамадзкага актывіста, у судзе не было.

Хоць, паводле матэрыялаў справы, грамадзкі актывіст не прызнаў сябе вінаватым, да таго ж ужо меў пакараньне — адседзеў пад арыштам двое сутак, судзьдзя Аляксандар Тарасюк прызнаў Віталя Амяльковіча вінаватым у закліку да грамадзян узяць удзел у несанкцыянаванай акцыі і пакараў яго штрафам на суму 15 базавых велічынь (345 рублёў).

XS
SM
MD
LG