Лінкі ўнівэрсальнага доступу

Сястры Саўчанкі забаранілі ўезд у Расею да 2020 году


Вера Саўчанка ў данецкім судзе
Вера Саўчанка ў данецкім судзе

Сястры ўкраінскай лётчыцы Надзеі Саўчанкі Веры забаранілі ўезд на тэрыторыю Расеі на 5 гадоў.

Пра гэта Вера Саўчанка паведаміла на сваёй старонцы ў Facebook.

Яна адзначыла, што падчас вяртаньня ва Ўкраіну на памежным пераходзе «Чарткова — Мілава» на мяжы РФ ёй паведамілі пра забарону ўезду ў Расею да 1 верасьня 2020 году.

Пры гэтым Вера адзначыла, што такое рашэньне было ініцыявана ФСБ.

«А як жа „суд“, я ж сьведка на судзе па справе сястрычкі. Можа, Платніцкаму таксама забароніць уезд у РФ служба ФСБ?» — напісала ў фэйсбуку сястра вядомай лётчыцы.

Адвакат Саўчанкі Марк Фейгін паведаміў у твітэры, што верагоднай падставай для забароны на ўезд была ч. 1 арт. 27 закону РФ «Аб выезьдзе і ўезьдзе» адносна пагрозы нацыянальнай бясьпецы. Ён мае намер абскардзіць такое рашэньне.

Суд над украінскай лётчыцай Надзеяй Саўчанка праходзіць у расейскім Данецку ў Растоўскай вобласьці. Саўчанку абвінавачваюць у датычнасьці да забойства двух расейскіх журналістаў летам мінулага году ў Луганскай вобласьці. Яна адмаўляе абвінавачаньні. Расейскія пракуроры абвясьцілі ўкраінцы абвінаваўчае заключэньне, па якім ёй пагражае да 25 гадоў зьняволеньня.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG