ЖЫВЫ БЛОГ. На выбарах у Вярхоўную Раду лідуюць Блёк Парашэнкі і Народны фронт

Так адбываюцца выбары ва Ўкраіне:

Украінцы ў Беларусі галасуюць неактыўна

Па стане на 13.00 на ўчастку, разьмешчаным у амбасадзе Ўкраіны ў Менску прагаласавала каля 100 чалавек з 7000, якія стаяць тут на консульскім уліку. На ўчастку вялікага ажыятажу няма, украінскія грамадзяне прыходзяць па аднаму — па два, сярод іх студэнты, спартоўцы. Да канца дня можа прыйсьці толькі каля 300 выбарцаў — спрагназаваў старшыня выбарчай камісіі. Яшчэ адзін участак дзейнічае на тэрыторыі ўкраінскага кансуляту ў Берасьці.

Больш за тысячу перасяленцаў з Крыма і Данбаса галасуюць на Львоўшчыне

На Львоўшчыне могуць прагаласаваць больш за тысячу перасяленцаў з Данбасу і Крыму. Менавіта столькі перасяленцаў зарэгістраваліся і выказалі жаданьне выбіраць новы парлямэнт Украіны. Усяго на Львоўшчыне пражывае больш за 6500 чалавек, якія перасяліліся з Крыма і Данбаса пасьля расейскай акупацыі.

МУС Украіны паведамляе аб прадухіленьні спробы тэракту

Як перадае УНІАН са спасылкай на намесьніка міністра ўнутраных спраў Украіны Сяргея Яравога, у Закарпацкай вобласьці апэратыўнікі затрымалі групу, якая мела намер зьдзейсьніць тэрарыстычны акт на адным з выбарчых участкаў.

На адным з участкаў у Кіеве (ФОТАГАЛЕРЭЯ)

Ва Ўкраіне праходзіць галасаваньне за кандыдатаў у дэпутаты Вярхоўнай Рады. На ўчастках Кіева назіраецца высокая актыўнасьць выбарнікаў. Кіяўляне ля выбарчых участках падзяліліся сваімі меркаваньнямі адносна таго, якой павінна быць новая Рада, а таксама пра стасункі з Расеяй і Беларусьсю. Фота Арцёма Лявы.

Парашэнка прагаласаваў за эўрапейскую будучыню Ўкраіны

Прэзыдэнт Украіны Пятро Парашэнка вярнуўся з Данбасу і а палове трэцяй прагаласаваў на ўчастку ў Доме афіцэраў у Кіеве. Парашэнка, выйшаўшы з кабінкі для галасаваньня, заявіў, што ён прагаласаваў за эўрапейскую будучыню Ўкраіны, за абнаўленьне ўлады, за новы урад, новую кааліцыю і новы парлямэнт.

"Мы спадзяемся сфармуляваць моцную праўкраінскую праэўрапейскую кааліцыю. Я толькі што пабываў у мясьцінах, дзе не было магчымасьці прагаласаваць пад час выбараў прэзыдэнта, у Славянску, Краматорску, Лісічанску. Цяпер людзі маюць магчымасьць прагаласаваць эўрапейскую будучыню нашай дзяржавы",— заявіў Парашэнка.