Лінкі ўнівэрсальнага доступу

Украіна плянуе аднавіць экспарт электраэнэргіі ў Беларусь і Малдову


Украіна з другога квартала 2016 году плянуе аднавіць экспарт электраэнэргіі ў Беларусь і Малдову. Украінскі бок ужо вядзе перамовы па гэтым пытаньні.

Пра гэта паведаміў журналістам намесьнік міністра энэргетыкі і вугальнай прамысловасьці Ўкраіны Аляксандар Свэтэлік.

«З другога квартала экспартныя магчымасьці будзем выстаўляць на аўкцыён. Будзем загружаць Беларусь і Малдову», — сказаў Свэтэлік.

Як сказаў карэспандэнту Свабоды эканаміст Барыс Жаліба, украінская электраэнэргія будзе для Беларусі таньнейшая, чым расейская:

«Беларусі выгадна купляць электраэнэргію ва Ўкраіны. І калі Ўкраіна, як і раней, адновіць пастаўкі, то гэта будзе ня кепска. Значыць, будзем меней купляць у Расеі, калі яна там даражэйшая».

Пастаўкі электраэнэргіі ў Беларусь і Малдову былі спыненыя ў 2014 годзе з-за вострага дэфіцыту энэргетычнага вугалю дзеля патрэбаў цеплавых электрастанцыяў краіны, перадае УНІАН.

Экспарт электраэнэргіі ў Беларусь быў спынены Ўкраінай з 1 кастрычніка 2014 году. Беларусь імпартавала невялікія аб’ёмы ўкраінскай электраэнэргіі параўнальна з расейскай.

У мінулым годзе міністар энэргетыкі Беларусі Ўладзімер Патупчык на прэс-канфэрэнцыі ў Менску заявіў, што Беларусь гатовая пастаўляць Украіне электраэнэргію і што гэта, маўляў, ініцыятыва ўкраінскага боку.

Міністар энэргетыкі і вугальнай прамысловасьці Ўкраіны Уладзімер Дзямчышын заявіў, што Ўкраіна не адчувае неабходнасьці імпартаваць электраэнэргію з Расеі, бо, каб забясьпечыць краіну, сваіх магутнасьцяў дастаткова.

Украіна 13 лістапада 2015 году спыніла імпарт расейскай электраэнэргіі. Гэта стала магчымым, калі на энэргаблёку № 3 Ровенскай АЭС скончылі рамонтныя працы і падключылі яго да нацыянальнай энэргасыстэмы.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG