Лінкі ўнівэрсальнага доступу

Забудоўнік у Ратамцы: Рашэньня пра знос не прымалася, мы ўсе тут будзем жыць


Словы чыноўніцы Менскага райвыканкаму пра знос дзесяці новых дамоў у Ратамцы нічым не абгрунтаваныя. Увод дамоў адбудзецца неўзабаве, і жыхарам не давядзецца даплачваць за кватэры. Такі вынік сходу жыхароў новага жыльлёвага комплексу ў Ратамцы з прадстаўніком кампаніі-забудоўніка.

Толькі на гэтым тыдні кампаніі «Драйрона» ўдалося дамовіцца з уладамі наконт уводу ў эксплюатацыю дзесяці дамоў у Ратамцы пад Менскам.

«Выйсьце з сытуацыі, чаму мы ня ўводзіліся з траўня, знойдзена», — паведаміў жыхарам Аляксей Мірашнічэнка, вядучы спэцыяліст па маркетынгу «Драйроны».

Аляксей Мірашнічэнка, вядучы спэцыяліст па маркетынгу кампаніі «Драйрона»

Аляксей Мірашнічэнка, вядучы спэцыяліст па маркетынгу кампаніі «Драйрона»

У пятніцу ён прысутнічаў на паседжаньні ў аблвыканкаме, дзе «Драйрона» разам з Генэральнай пракуратурай і ўладамі дамовілася наконт умоў, на якіх дамы будуць уведзеныя ў эксплюатацыю.

Як пісала Свабода, дамы пабудавалі яшчэ летам. Цяпер жыхары тут робяць рамонты ў сваіх кватэрах, а некаторыя нават засяліліся.

Пры гэтым дамоваў на ўласнасьць яшчэ ніхто ня мае, бо забудоўнік так і ня ўвёў у эксплюатацыю жыльлёвы комплекс.

Жыльлёвы комплекс месьціцца ў цэнтры пасёлку Ратамка ў Менскім раёне

Жыльлёвы комплекс месьціцца ў цэнтры пасёлку Ратамка ў Менскім раёне

Каб даведацца прычыну, прадстаўнікі ініцыятыўнай групы прыйшлі на прыём да намесьніка старшыні Менскага райвыканкаму Ірыны Савіцкай у панядзелак 12 чэрвеня.

«Спадарыня Савіцкая адказала, што будаўніцтва праведзена самавольна, — сказаў на сходзе Аляксей Рымша, прадстаўнік ініцыятыўнай групы жыхароў. — З прычыны таго, што няма ўзгадненьняў з санстанцыяй, чыгункай, выканкам адклікаў свой дазвол на будаўніцтва. Прынятае рашэньне выканкаму пра поўны знос усяго кварталу забудовы».

Аляксей Рымша (у цэнтры), прадстаўнік ініцыятыўнай групы жыхароў

Аляксей Рымша (у цэнтры), прадстаўнік ініцыятыўнай групы жыхароў

Паводле Савіцкай, рашэньне пра знос выканкам накіраваў забудоўніку. Але як паведамілі Свабодзе ў «Драйроне», ніякіх дакумэнтаў пра знос кампанія не атрымлівала.

«Выканкам ніякіх дакумэнтаў не прадстаўляў, — сказаў Рымша. — Усё выключна ў вуснай форме. Наколькі гэта адпавядае рэчаіснасьці, сказаць немагчыма».

Аляксей Мірашнічэнка, які наведаў паседжаньне аблвыканкама, таксама пацьвердзіў, што рашэньня пра знос дамоў не прымалася.

Сама Ірына Савіцкая адмовілася камэнтаваць Свабодзе сытуацыю з жыльлёвым комплексам у Ратамцы.

На сходзе жыхароў і «Драйроны»

На сходзе жыхароў і «Драйроны»

У той жа час «Драйрона» прызнала парушэньні заканадаўства і нават тое, што забудова праведзеная самавольна.

«Мы прызналі самавольнае будаўніцтва, якое не пацягнула сур’ёзных парушэньняў, — сказаў Мірашнічэнка. — Гэта ўзважаная пазыцыя ўсіх бакоў».

У чым дакладна правінілася «Драйрона», Мірашнічэнка так і не сказаў.

«Пры дзейным заканадаўстве мы вінаватыя, — сказаў ён. — Але мы ня скралі сродкаў, ня зьбеглі нікуды. У той час, як усе прыпынялі будоўлі і выводзілі грошы, мы тут збудаваліся».

Мірашнічэнку паабяцалі, што ў пачатку наступнага тыдня з аблвыканкаму прыйдзе дакумэнт, дзе прапішуць умовы здачы дамоў. Цягам аднаго-двух тыдняў «Драйрона» спадзяецца прайсьці апошнія экспэртызы, пасьля чаго ўлады прымуць дамы ў эксплюатацыю.

На пытаньне жыхароў, ці падключаць у дамах газ (тут няма цэнтральнага ацяпленьня, і дамы абаграюцца праз газавыя калёнкі), Мірашнічэнка адказаў, што «іншых варыянтаў няма».

«Мы ўсе тут будзем жыць», — дадаў ён.

XS
SM
MD
LG