Як паведамляе расейскае МЗС, міністры «зьвераць падыходы» да актуальных двухбаковых пытаньняў, а таксама па міжнародным і рэгіянальным парадку дня, у першую чаргу — па сытуацыі ва Ўкраіне.
«Сёньня вельмі важная бесьперабойная праца Кантактнай і рабочых падгрупаў па ўрэгуляваньні крызісу ў гэтай краіне. Беларускі бок прадаставіў сваю тэрыторыю ў якасьці перамоўнай „пляцоўкі“ і ня раз заяўляў аб сваёй зацікаўленасьці ў больш хуткім урэгуляваньні ўкраінскага крызісу», — гаворыцца ў камэнтары МЗС Расеі.
Будуць таксама абмеркаваныя стан і пэрспэктывы адносінаў Расеі і Беларусі з Эўразьвязам і ЗША, у тым ліку ў кантэксце саміту «Ўсходняга партнэрства», які адбыўся 21–22 траўня ў Рызе, паведамляе БелаПАН.