Лінкі ўнівэрсальнага доступу

У Гомелі павязалі жалобныя стужкі на дрэвы, што зьнясуць для пашырэньня дарогі


Грамадзкія актывісты Гомеля зладзілі на Пралетарскай вуліцы экалягічны пэрформанс: «Памятаем, смуткуем». На двух з паловай дзясятках маладых дрэўцаў уздоўж вуліцы яны завязалі чорныя жалобныя стужкі — на знак пратэсту супраць зьнішчэньня неўзабаве гэтых зялёных насаджэньняў.

«Ня так даўно вуліцу Пралетарскую рэканструявалі — паклалі новыя ходнікі, асфальт, пасадзілі маладыя дрэўцы, — кажа ўдзельнік пэрформансу, актывіст кампаніі „Наш дом“ Андрэй Аксёнаў. — Цяпер усё гэта хочуць зруйнаваць, каб пашырыць вуліцу для праезду транспарту. Ва ўсім сьвеце дбаюць пра экалёгію гарадоў, робяць іх больш камфортнымі для пешаходаў, а ў нас наадварот: дрэвы зьнішчаюць, завабліваюць транспарт у горад, замест таго каб выводзіць яго за межы гораду. Паглядзіце, што сталася з вуліцамі Кірава, Ланге, Сялянскай, дзе павысякалі дрэвы для камфорту аўтамашын. Таму мы й павязалі стужкі на чарговых зялёных ахвярах гарадзкіх чыноўнікаў».

Яшчэ да правядзеньня пэрформансу актывісты аргкамітэту па стварэньні партыі БХД, кампаніяў «Будзьма беларусамі» і «Наш дом» зьбіралі подпісы гараджанаў з патрабаваньнем да гарвыканкаму правесьці грамадзкія слуханьні наконт мэтазгоднасьці рэканструкцыі вуліц Пралетарскай, Інтэрнацыянальнай, будоўлі пад плошчай Леніна трох падземных пераходаў, а таксама вяртаньня вуліцы Кірава першапачатковага выгляду. Аднак гарвыканкам адказаў, што заканадаўства не патрабуе грамадзкага абмеркаваньня для вядзеньня рэканструкцыі. Больш за тое, у бюджэце гораду на сёлетні год ужо прадугледжана выдзеліць 210 мільёнаў рублёў на падрыхтоўку перадпраектнай (інвэстыцыйнай) дакумэнтацыі на рэканструкцыю вуліц Пралетарскай, Інтэрнацыянальнай ды падземных пераходаў пад цэнтральнай плошчай гораду.

Паказаць камэнтары

XS
SM
MD
LG