Свабода запісала першыя сьведчаньні затрыманых на Дзень Волі ў Менску, якіх выпусьцілі з пастарункаў.
Як сказала Свабодзе адна з затрыманых сёньня ў цэнтры Менску, якая назвалася Тацянай, удзельнікаў акцыі і мінакоў, якіх аўтазакамі прывозілі ў РУУС Заводзкага раёну, каля 2 гадзін трымалі ў двары пастарунку тварамі да сьцяны.
І толькі потым групамі пачалі афармляць, фіксаваць пашпартныя зьвесткі, высьвятляць, зь якімі намерамі яны былі ў цэнтры Менску, здымаць на фота і нават запісваць голас.
Пасьля гэтай доўгай працэдуры спадарыню Тацяну адпусьцілі, але яе муж яшчэ некалькі гадзін заставаўся ў пастарунку.
Паказваць свой твар і называць прозьвішча спадарыня Тацяна не захацела, бо баіцца, што страціць працу і ёй забароняць выезд за мяжу.
Спадарыня Тацяна бачыла тры заезды аўтобусаў з затрыманымі ў Заводзкі РУУС.
Прынамсі двое з затрыманых у Заводзкім РУУС былі непаўналетнія. Да аднаго з затрыманых увечары выклікалі хуткую дапамогу, але лекары адмовіліся патлумачыць прычыны выкліку.
Пра тое, што затрыманых прымушалі ў пастарунках стаяць тварам да сьценкі, сьведчыць фота двара Савецкага РУУС Менску.
На ім бачна, як вакол сьцен на холадзе і пад дажджом стаяць затрыманыя з Дня Волі.
