Лінкі ўнівэрсальнага доступу

Шумчанка пра заявы Лукашэнкі: Хай людзі радуюцца! Ён паказаў, што вы да яго дагрукаліся


Анатоль Шумчанка

Анатоль Шумчанка

Старшыня грамадзкага аб’яднаньня «Пэрспэктыва» Анатоль Шумчанка пракамэнтаваў Свабодзе сёньняшнія заявы Аляксандра Лукашэнкі на адрас дробных прадпрымальнікаў.

Прымаючы з дакладам міністра гандлю Ўладзімера Катловіча, Аляксандар Лукашэнка запатрабаваў прыняць меры, каб усе гандлёвыя структуры, дзяржаўныя і прыватныя, працавалі ў роўных умовах, абвінаваціў прадпрымальнікаў у развале эканомікі, а міністру гандлю сказаў трымацца ранейшых дамоўленасьцяў:

«І не глядзіце на забастоўкі нейкіх іпэшнікаў ці яшчэ кагосьці. Мы дакладна дамовіліся летась! Мы не пацаны, каб нас вадзіць за нос, тым больш мяне. Мы дамовіліся — у гэтым ключы трэба дзейнічаць».

Старшыня грамадзкага аб’яднаньня «Пэрспэктыва» Анатоль Шумчанка заявіў Свабодзе, што ня бачыць «прысуду» ў словах Лукашэнкі — маўляў, дыялёг пачаўся:

«Роўныя ўмовы, пра якія ён кажа, значаць таксама прыняцьце рашэньняў на роўных. Цяпер пачаліся перамовы ў межах Міністэрства эканомікі зь сябрамі ўраду, яны распачатыя 8-га і расьпісаныя да 17-га. Працоўная група сфармаваная, нас пачулі, перамовы будуць весьціся, сытуацыю будуць урэгулёўваць.

Ну, так, ёсьць такая заява, ну, так, выказаўся. Але хай людзі радуюцца! Вось мне пачынаюць пісаць: „гэта прысуд“, „што ж будзе“, „ён сказаў“.

Людзі, ён паказаў, што вы да яго дагрукаліся, ён пра вас чытае і ведае вашы праблемы. А праблема будзе вырашаная, бо яна сур’ёзная, усе пераканаліся ў гэтым.

Што ён так выказваецца — што ж, мае права. Ці першы раз мы чуем ад яго гэтыя выказваньні? Таму спакой!

Забараняе зьвяртаць увагу на забастоўкі — дык ён сваім выступам кажа, што яны ведаюць і ўжо зьвярнулі ўвагу на гэта. І вынікам гэтага стала тое, што пачынаюцца перамовы».

За дзень да заяваў Лукашэнкі прадпрымальнікам паабяцалі правесьці адмысловую сустрэчу з уладамі адносна ўказу № 222. Нягледзячы на абяцаньні дыялёгу, грамадзкае аб’яднаньне «Пэрспэктыва» не адклікала заяўку на мітынг 15 лютага. Адказ на яе мае прыйсьці ў сераду, 10 лютага.

Паказаць камэнтары

XS
SM
MD
LG