Лінкі ўнівэрсальнага доступу

logo-print

Праваабаронцу з Гомеля Леаніда Судаленку спрабуюць зрабіць парушальнікам


Леанід Судаленка

Леанід Судаленка

Намесьнік начальніка аддзелу мытных дасьледаваньняў Гомельскай мытні Мікалай Багамолаў позвай выклікаў 17 верасьня праваабаронцу Леаніда Судаленку, каб скласьці пратакол аб адміністрацыйным правапарушэньні.

«З позвы, атрыманай праз пошту, я даведаўся, што ў дачыненьні да мяне вядзецца адміністрацыйны працэс. З гэтага вынікае, што я маю права ня толькі на адваката, але й на журналіста, каб давесьці грамадзкасьці, як на дзяржаўнай мяжы мытнікі выконваюць „далікатныя даручэньні“, каб разьдзяваць грамадзянаў, як аказваюцца „заточанымі“ памежнікі на пашпарт чалавека, які невядома якім чынам трапіў у сакрэтныя „чорныя сьпісы“.

Канвэрт з позвай мне ўручылі пад подпіс на пачатку дзясятай гадзіны, а ў дзесяць я мусіў быць у Гомельскай мытні. І паколькі я ня меў магчымасьці падрыхтавацца, заключыць дамову з адвакатам, то вырашыў сёньня не ісьці ў мытню», — распавёў Леанід Судаленка.

Паводле праваабаронцы, сёлета ў дачыненьні да яго мытнікі двойчы ўжывалі выключную меру мытнага кантролю — паглыблены асабісты агляд, прымушалі здымаць штаны, забралі ноўтбук. Апошні раз гэта адбылося 25 жніўня, калі праваабаронца вяртаўся зь Вільні ў Менск.

На памежным пункце пропуску Гудагай пасьля праверкі дакумэнтаў ад Судаленкі запатрабавалі пакінуць цягнік у Маладэчне, каб правесьці паглыблены асабісты агляд. Але паколькі пра падставы такога дзеяньня ні мытнікі, ні памежнікі нічога не патлумачылі, то праваабаронца адмовіўся пакідаць вагон. У Маладэчне Судаленку сілай вынесьлі з вагона за рукі і за ногі.

Выглядае, што па даручэньні Менскай рэгіянальнай мытні ў Гомелі цяпер і хочуць хутка скласьці супраць праваабаронцы адміністрацыйны пратакол на падставе артыкула 23.4 КаАП — непадпарадкаваньне законнаму патрабаваньню службоўца. За гэта прадугледжаны штраф ад 360 тысяч да 9 мільёнаў рублёў альбо адміністрацыйны арышт да 15 сутак.

«Я не адмаўляюся ісьці ні ў мытню, ні ў суд, калі спатрэбіцца. Але я ня буду гэта рабіць бягом, не зважаючы, што мае правы парушаюцца. Спадзяюся, што ў судзе ў мяне будзе магчымасьць выклікаць і памежнікаў, каб яны патлумачылі, якім чынам маё прозьвішча трапіла ў „чорны сьпіс“. Я не займаюся палітыкай, камэрцыяй. Выглядае, што трасуць мяне за праваабарончую дзейнасьць. Тады патлумачце, чаму? Існаваньне „чорных сьпісаў“ на мяжы — гэта ж незаконна, бо не былі абнародаваны хоць нейкія заканадаўчыя акты на гэты конт Апрача таго, у позьве было пазначана, што выклікаюць мяне ў аддзел мытных дасьледаваньняў „у якасьці парушальніка“. Суду яшчэ не было, а мяне ўжо прызналі парушальнікам», — заўважае праваабаронца Судаленка.

XS
SM
MD
LG