Лінкі ўнівэрсальнага доступу

Суд у Гомлі спыніў разгляд пазову «дармаеда» Аляксандра Сямёнава


21 лютага суд Цэнтральнага раёну Гомеля спыніў разгляд пазову «дармаеда» Аляксандра Сямёнава да падатковай інспэкцыі. Падстава — у сувязі зь непадведамнасьцю. Аляксандар Сямёнаў патрабаваў прызнаць неправамерным патрабаваньне дзяржавы аб сплаце «падатку на дармаедзтва».

Пазоў да раённай падатковай інспэкцыі беспрацоўны гамяльчук Аляксандар Сямёнаў выставіў у адказ на атрыманы ім так званы «ліст шчасьця» — паведамленьне, што на падставе дэкрэту № 3 ён мусіць сплаціць збор на фінансаваньне дзяржвыдаткаў у суме 360 рублёў.

Паседжаньне суду праходзіла пад пэрыядычнае скандаваньне дзясяткаў гараджанаў, якія не ўмясьціліся ў невялікую залю і засталіся на вуліцы. Яны крычалі: «Не — дэкрэту № 3, Лукашэнка — сыходзь!».

Аляксандар Сямёнаў папрасіў дадаць да матэрыялаў справы рашэньне Гомельскага гарвыканкаму аб вызваленьні яго ад сплаты «дармаедзкага» падатку. Такое рашэньне ўлады прынялі напярэдадні, прызнаўшы нарэшце, што ў яго цяжкая жыцьцёвая сытуацыя.

Журналістам Сямёнаў сказаў, што ў цэнтры занятасьці яму таксама прапанавалі працу вартаўніком у будаўнічай арганізацыі.

Загадчыца юрыдычнага сэктару падатковай інспэкцыі Цэнтральнага раёну Натальля Яркова настойвала ў судзе, што паведамленьне пра сплату збору было абгрунтаванае:

«Няхай пазоўца і яго прадстаўнік назавуць, — сказала Яркова, — якія артыкулы законаў падатковая інспэкцыя парушыла, дасылаючы Сямёнаву паведамленьне аб неабходнасьці выплаты збору на фінансаваньне дзяржаўных расходаў».

Прадстаўнік Сямёнава ў судзе Леанід Судаленка патлумачыў, паводле якіх крытэрыяў дэкрэт № 3 супярэчыць Канстытуцыі: тут і прымусовая праца, і выбарачнае вызначэньне віду падаткаў, і супярэчнасьці ў самім дэкрэце.

Паколькі канфлікт Аляксандра Сямёнава з падатковай інспэкцыяй вычарпаны рашэньнем Гомельскага гарвыканкаму, які вызваліў яго ад «дармаедзкага» збору, судзьдзя й спыніў справу.

«Сэнсацыі не адбылося, — сказаў па завяршэньні судовага паседжаньня юрыст Судаленка. — Рашэньне было чаканае. Лічу, што прымалася яно на больш высокім узроўні. Але яно не вырашае пытаньняў чатырохсот зь лішнім тысяч чалавек, якія атрымалі такія ж паведамленьні, як і Сямёнаў. Дый Аляксандра Сямёнава вызвалілі ад падатку на „дармаедзтва“ толькі за 2015 год. Трэба ўсім разам дамагацца адмены гэтага антыканстытуцыйнага дэкрэту».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG