Лінкі ўнівэрсальнага доступу

logo-print

Суд часткова задаволіў пазоў Моўчана: Шпакоўская павінна заплаціць 18 мільёнаў


Алег Моўчан, Наста Шпакоўская

Алег Моўчан, Наста Шпакоўская

Вярхоўны суд часткова задаволіў пазоў кампазытара Алега Моўчана да сьпявачкі Насты Шпакоўскай. Суд прызнаў, што Шпакоўская парушыла правы Моўчана, выканаўшы яго песьню «Малітва» ў сваёй аранжыроўцы. Але з заяўленых 18 мільёнаў рублёў суд задаволіў патрабаваньне аб кампэнсацыі толькі ў памеры 9 мільёнаў рублёў. Таксама суд часткова задаволіў кампэнсацыю стратаў на адваката — з 9 мільёнаў толькі пяць мільёнаў рублёў. Кампэнсацыю часткова павінны будуць выплаціць, апроч Шпакоўскай, музыкі Дзьмітры Харытановіч, Аляксей Паўловіч і Сяргей Шчурко, якія прычыніліся да аранжыроўкі песьні «Малітва». Такім чынам, Шпакоўская кампэнсуе 5 мільёнаў 780 тысяч рублёў, а музыкі — кожны па 2 мільёны 890 тысяч.

Суд не задаволіў сустрэчны пазоў Шпакоўскай да Моўчана аб высьвятленьні аўтарства песьні «Малітва». Яна цьвердзіць, што аўтарства не належыць выключна Моўчану і ён пісаў песьню разам з Уладзімерам Мулявіным.

Шпакоўская сказала, што яна задаволеная рашэньнем суду, бо прадэманстравала, што гэтая песьня належыць ня толькі Моўчану. А яе аўтарам быў таксама Мулявін, хоць суд гэтага і не пацьвердзіў.

Алег Моўчан таксама задаволены рашэньнем суду, хоць атрымаў ня ўсе грошы, якіх патрабаваў. Паводле Моўчана, галоўнае, што ён пацьвердзіў сваё аўтарскае права і што аўтар можа абараніць свае аўтарскія правы ў судзе.

Абодва бакі ня будуць абскарджваць рашэньне суду.

26 сакавіка адвакат кампазытара Алега Моўчана ад ягонага імя зьмяніў пазоў, які раней выставіў да лідэра і сьпявачкі гурту NAKA Насты Шпакоўскай. Другім разам пазоў быў выстаўлены ня толькі да Насты Шпакоўскай, але і да іншых музыкаў гурту, якія бралі ўдзел у новай аранжыроўцы песьні Алега Моўчана «Малітва». Новую аранжыроўку кампазытар палічыў парушэньнем сваіх аўтарскіх правоў.

XS
SM
MD
LG