Лінкі ўнівэрсальнага доступу

Прафсаюз ЭГУ патрабуе сфармаваць новую камісію па абраньні рэктара


Старшыня прафэсійнага зьвязу працаўнікоў ЭГУ «EHUnion», выкладчык паліталёгіі Канстанцін Ткачоў, спасылаючыся на пастанову кантралёра Літоўскай Рэспубікі па акадэмічнай этыцы і працэдурах, заклікае Агульны сход саўладальнікаў ЭГУ звольніць з пасады сябраў Кіроўнай рады і прэзыдэнта ЭГУ.

Канстанцін Ткачоў нагадвае, што 24 лютага 2015 году ЭГУ прайграў судовы разбор, у якім абскарджваў пастанову Кантралёра Літоўскай Рэспублікі па акадэмічнай этыцы і працэдурах ад 30 красавіка 2014 году, якая прызнала шэраг рашэньняў Кіроўнай рады ЭГУ такімі, што парушаюць Статут і працэдуры ЭГУ. Віленскі акруговы адміністрацыйны суд прызнаў скаргу ЭГУ беспадстаўнай і падтрымаў пастанову Кантралёра па ўсіх пунктах.

«Усе раней адзначаныя экспэртамі і публічна агучаныя праблемы ўнівэрсытэту — адсутнасьць стратэгічнага мысьленьня, аўтарытарны стыль кіраваньня, непразрыстасьць і неэфэктыўнасьць фінансавай палітыкі, непразрыстасьць і дыскрымінацыйны характар кадравай палітыкі датычна грамадзянаў Беларусі, пагаршэньне іміджу ўнівэрсытэту ў Беларусі і ў Літве — дагэтуль застаюцца нявырашанымі», — сьцьвярджаецца ў заяве кіраўніка прафсаюзу.

Канстанцін Ткачоў ад імя Рады прафсаюзу зьвярнуўся да сёньняшняга Агульнага сходу суўладальнікаў ЭГУ з наступнымі прапановамі:

  • спыніць дзейнасьць дзейнай камісіі па адборы кандыдатаў на пасаду рэктара ЭГУ з тае нагоды, што ў яе склад уваходзяць асобы, якія парушалі Статут і працэдуры ЭГУ;
  • не прымаць да ўвагі рэкамэндацыяў гэтай камісіі па пытаньні адбору рэктара ЭГУ;
  • дзеля забясьпячэньня празрыстасьці адбору, распрацаваць, зацьвердзіць і распаўсюдзіць Палажэньне аб выбарах рэктара ЭГУ;
  • сфармаваць новую камісію па адборы кандыдатаў і ўключыць у яе склад міжнародных і беларускіх экспэртаў, а таксама прадстаўнікоў акадэмічнае супольнасьці ЭГУ, забясьпечыўшы незалежнасьць камісіі ад існае сыстэмы кіраваньня ўнівэрсытэтам;
  • на падставе шматразовых парушэньняў статуту і працэдураў ЭГУ звольніць з пасадаў сябраў Кіроўнай рады і прэзыдэнта ЭГУ, вінаватых у згаданых парушэньнях.

Рэакцыі адміністрацыі ЭГУ на заяву лідэра прафсаюза пакуль няма, але Свабода будзе працягваць імкнуцца ўзяць камэнтар на гэты конт.

Імя новага рэктара ЭГУ павінны назваць 2 сакавіка. На гэты дзень заплянаваны агульны сход заснавальнікаў ЭГУ, падчас якога павінна быць прынятае рашэньне.

Пасада рэктара стала вакантнай пасьля таго, як у верасьні 2014 году яе пакінуў Анатоль Міхайлаў, які заснаваў унівэрсытэт і кіраваў ім з моманту яго стварэньня.

Шорт-ліст прэтэндэнтаў складаецца з шасьці імёнаў. Гэта трое грамадзян Беларусі — лідар руху «За Свабоду» Аляксандар Мілінкевіч, гісторык Алесь Краўцэвіч і філёзаф Тацьцяна Шчытцова. Двое — грамадзяне ЗША: Дэвід Полік, які цяпер выконвае абавязкі рэктара, і дырэктар офісу Інстытуту міжнароднай адукацыі (Масква) Эдвард Рослаф. Яшчэ адзін кандыдат, цяперашні прарэктар ЭГУ па разьвіцьці і камунікацыі Дарыюс Удрыс мае грамадзянствы Літвы і ЗША.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG