Лінкі ўнівэрсальнага доступу

Студэнты ЭГУ хочуць удзельнічаць у выбарах рэктара


Дзяніс Кучынскі

Дзяніс Кучынскі

9 і 10 студзеня Студэнцкае прадстаўніцтва і Асацыяцыя выпускнікоў ЭГУ ладзяць міжнародную канфэрэнцыю «Беларускі ЭГУ: 10 год у Літве».

Адна з мэтаў студэнцкай канфэрэнцыі — паўплываць на выбар рэктара. Прэзыдэнт Студэнцкага прадстаўніцтва ЭГУ Дзяніс Кучынскі тлумачыць:

«Галоўная мэта канфэрэнцыі — стварыць дакумэнт, каб мы маглі мець яснае, зразумелае ўяўленьне пра тое, куды мы хочам крочыць. Таму што праз новага рэктара будзе і адмысловая палітыка ўнівэрсытэту. Я спадзяюся, што гэты дакумэнт і наагул гэтая канфэрэнцыя дапамогуць паўплываць на выбары рэктара».

Цяпер у шорт-лісьце прэтэндэнтаў на пасаду рэктара — тры беларусы (Аляксандар Мілінкевіч, Алесь Краўцэвіч і Тацяна Шчытцова), тры амэрыканцы (цяперашнія правост ЭГУ Дэвід Полік і прарэктар па разьвіцьці і камунікацыях Дарыюс Удрыс, а таксама Эдвард Рослаф), сёмы — літовец Шарунас Ліекіс. Канчатковыя рэкамэндацыі па кандыдатуры новага рэктара Агульнаму сходу сузаснавальнікаў (органу, адказнаму за прыняцьце канчатковага рашэньня) павінны быць зробленыя да 1 сакавіка 2015 году.

На студэнцкую канфэрэнцыю запрошаныя ўсе сем кандыдатаў на пасаду рэктара. Свой удзел пацьвердзілі цяперашні прарэктар па разьвіцьці і камунікацыях ЭГУ Дарыюс Удрыс, Аляксандар Мілінкевіч, Тацяна Шчытцова і Шарунас Ліекіс. Мяркуецца, што яны прадставяць студэнтам свае перадвыбарчыя праграмы.

Прэзыдэнт Студэнцкага прадстаўніцтва ЭГУ Дзяніс Кучынскі кажа:

«Чыста сымбалічная мэта ў тым, што мы ўпершыню спрабуем аб’яднаць усіх беларускіх стэйкхолдэраў (гэта стала ўжо модным словам) унівэрсытэту — то бок гэта і выкладчыкі, і выпускнікі, і студэнты, у тым ліку гэта і грамадзянская супольнасьць, зацікаўленыя ў агульным праекце, у тым, што адбываецца ў ЭГУ».

На міжнароднай канфэрэнцыі «Беларускі ЭГУ: 10 год у Літве» плянуюцца выступы беларускай грамадзкасьці, выкладчыкаў, выпускнікоў, студэнтаў унівэрсытэту, адкрытыя дыскусіі, круглыя сталы, прыняцьце агульнай рэзалюцыі.

XS
SM
MD
LG