Лінкі ўнівэрсальнага доступу

Што стаіць за ператрусамі ў Магілёве? Пытаньняў больш, чым адказаў


Ігар Барысаў пасьля ператрусу

Ігар Барысаў пасьля ператрусу

12 сакавіка ў кватэры магілёўскага журналіста Ігара Барысава адбыўся ператрус. Супрацоўнікі міліцыі забралі кампутары, мадэм і нататнік. Паводле журналіста, нагодай «для агляду месца меркаванага правапарушэньня» сталася заява ў міліцыю кіраўніка аднаго зь мясцовых прадпрыемстваў, які ўгледзеў у публікацыі на рэдагаваным Барысавым сайце «Наш Магілёў» непраўдзівыя зьвесткі пра сябе. Па той жа справе міліцыянты забралі кампутары з прыватнай кватэры, дзе зьбіраюцца магілёўскія праваабаронцы. У іх таксама будуць шукаць доказы віны Барысава.

Ігар Барысаў кажа, што два месяцы таму, як вынікае з санкцыі пракурора, у міліцыю паскардзіўся генэральны дырэктар акцыянэрнага таварыства «Стужка» з абвінавачаньнямі на рэдактара газэты «Наш Магілёў» у паклёпе. Паводле журналіста, справа супраць яго яшчэ не распачата — вядзецца праверка.

«У інтэрнэце пра яго была разьмешчаная інфармацыя, — пераказвае сутнасьць абвінавачваньня Ігар Барысаў, — што ён нібыта ў казіно прайграў сваю кватэру і акцыі прадпрыемства. І гэта паклёп. Падазраваным у разьмяшчэньні інфармацыі ён пазначыў газэту „Наш Магілёў“ і канкрэтна мяне як рэдактара».

Ігар Барысаў зазначае, што публікацыя, якая стала нагодай для ператрусу, разышлася па інтэрнэце. Яе разьмясьцілі некалькі недзяржаўных сайтаў.

«Таму, у прынцыпе, яна магла нанесьці шкоду яму. Будзем шукаць крыніцу, якая пацьвердзіць, што такія факты. Пісаў журналіст. Будзем зь ім размаўляць. Казаць пра тое, што гэта ўсё зьвязана з выбарамі, я пакуль не бяруся. Дапускаю, што гэта супадзеньне. Я, аднак, ня буду цалкам адмаўляць такую сытуацыю. Цяпер жа прэса пад пэўным кантролем».

Журналіст застаўся без кампутара

Журналіст застаўся без кампутара

Чацьвёра міліцыянтаў і двое панятых зьявіліся, як кажа журналіст, раніцай. Падчас ператрусу паводзілі сябе карэктна. Копіяў дакумэнтаў на ператрус і пратаколу журналісту не пакінулі. Паабяцалі, што праз два тыдні, магчыма, аргтэхніку вернуць.

Па заканчэньні ператрусу ў Барысава тыя ж міліцыянты з тымі ж панятымі наведаліся да праваабаронцаў. Адзін зь іх, Барыс Бухель, кажа, што падставы для агляду памяшканьня былі тыя самыя, што і ў журналіста — заява генэральнага дырэктара акцыянэрнага таварыства «Стужка» пра паклёп на яго. У праваабаронцаў забралі тры кампутары.

Актывісты пакуль асьцярожна камэнтуюць падзеі сёньняшняга дня.

Праваабаронца Аляксей Колчын дапускае, што ператрус, які правялі ў іх на кватэры, сапраўды можа быць зьвязаны са справай Барысава, бо той карыстаўся тамтэйшай тэхнікай. Аднак праваабаронцу дзівіць маштаб міліцэйскай апэрацыі:

«Па-мойму, асабістых кампутараў журналіста было дастаткова. Пры чым тут тэхніка іншых людзей?» — разважае Колчын і ставіць пытаньні, на якія пакуль няма адказаў:

«Мо ў іх была цікавасьць да тэхнікі праваабаронцаў? Паглядзім, як будуць разьвівацца падзеі далей. Ці спыняцца гэтыя выманьні толькі на нас, ці працягнуцца? Як хутка вернуць тэхніку? Пакуль цяжка што-небудзь канкрэтнае казаць».

XS
SM
MD
LG