Лінкі ўнівэрсальнага доступу

Хто ў Эўропе імкнецца да незалежнасьці?


Артур Мас падчас канфэрэнцыі ў Барсэлёне, 25 лістапада 2012
Артур Мас падчас канфэрэнцыі ў Барсэлёне, 25 лістапада 2012

Артур Мас, лідэр Саюзнага альянсу, партыі якая зараз кіруе ў Каталёніі, заявіў, што ў выпадку перамогі на чарговых рэгіёнальных выбарах, будзе дамагацца поўнай незалежнасьці Каталёніі ад Гішпаніі.

У сваю чаргу ў мінулым месяцы парлямэнт Гішпаніі забараніў правядзеньне рэфэрэндуму аб незалежнасьці ў паўночнай частцы правінцыі. Прадстаўнікі цэнтральнага ўраду падкрэсьліваюць, што Канстытуцыя каралеўства не прадугледжвае выхаду са складу дзяржавы якіх-небудзь яе частак.
Між тым паводле апытаньняў прыблізна палова каталёнцаў выступаюць за ўтварэньне незалежнай дзяржавы.

Каталёнскі марш за незалежнасьць, 12верасьня 2012
Каталёнскі марш за незалежнасьць, 12верасьня 2012
Каталёнія мае сваю ўласную мову і самабытную культуру, яна налічвае 7.5 мільёнаў жыхароў. Законы правінцыі патрабуюць, каб настаўнікі, лекары і работнікі дзяржаўнага сэктара выкарыстоўвалі каталёнскую афіцыйную мову разам з гішпанскай.

Эканамічны крызіс абвастрыў палітычны канфлікт паміж Мадрыдам і Барсэлёнай, палітыка жорсткай эканоміі цэнтральнага ўраду узмацніла сэпаратысцкія настроі. Праўда, менавіта Каталёнія зьяўляецца адным з самых багатых рэгіёнаў краіны, але і яе запазычанасьць перад Мадрыдам адна з самых высокіх. Аднак да гэтага ў мінулыя выходныя ўрад Гішпаніі паведаміў, што Каталёнія атрымае ў хуткім часе 3.3 мільярды даляраў для пагашэньня запазычанасьці.

Памкненьні да незалежнасьці маюць месца і ў Краіне Баскаў, яшчэ адным рэгіёне Гішпаніі. Краіна Баскаў, у адрозьненьні ад большасьці з 17ці правінцый Гішпаніі, пасьпяхова вядзе эканамічную палітыку і не мае патрэбы ў дапамозе ад цэнтральнага ўраду. Як і каталёнцы, баскі маюць уласную мову і культуру, насельніцтва рэгіёну складае крыху больш за 2 мільёны чалавек.
У Краіне Баскаў ёсьць уплывовыя палітычныя сілы, якія дамагаюцца яе адддзяленьня ад Гішпаніі. Экстрэмісцкая сэпаратысцкая групоўка ЭТА, якая дзесяцігодзьдзямі практыкавала гвалт для дасягненьне сваіх мэтаў, у кастрычніку летась заявіла аб канчатковым спыненьні ўзброенай барацьбы.
Варта адзначыць, што Гішпанія — адна з нешматлікіх краін Эўразьвязу, якая дагэтуль не прызнала незалежнасьці Косава.

Сярод краін Эўразьвязу ёсьць яшчэ прынамсі тры, якія маюць рэгіёны з большай ці меншай прагай да незалежнасьці.

У мінулым месяцы падчас візыту брытанскага прэм’ера Дэвіда Кэмэрана ў Шатляндыю былі канчаткова ўзгодненыя ўмовы правядзеньня ў Шатляндыі рэфэрэндуму аб незалежнасьці. Шатляндыя зьяўляецца часткай Аб’яднанага Каралеўства 305 гадоў, у рэгіёне жыве 5.2 мільёны чалавек. Пасьля перамогі на апошніх лякальных выбарах Шатляндзкай нацыянальнай партыі памкненьні да незалежнасьці ў рэгіёне вырасьлі.
​Паўночная частка Бэльгіі — Фляндрыя — мае насельніцтва ў 6.2 мільёны чалавек. Сталіца краіны Брусэль таксама знаходзіцца ўва Фляндрыі. Фляндрыя атрымала высокую ступень аўтаноміі у 80-90-х гадах мінулага стагодзьдзя, падчас фэдэралізацыі краіны паводле моўнай прыкметы. Урад Фляндрыі мае вялікія паўнамоцтвы ў такіх сфэрах, як сельская гаспадарка, транспарт і зьнешні гандаль. Фляндрыя больш пасьпяховы рэгіён Бэльгіі, чым паўднёвая франкамоўная Валёнія, ўзровень беспрацоўя на паўначы краіны ўдвая ніжэй, чым на поўдні.


Партыя «Паўночная ліга» ў Італіі, створаная ў 90-х гадах, мела на мэце аддзяленьне больш эканамічна пасьпяховых паўночных рэгіёнаў краіны ад больш беднага поўдня. Была прыдуманая нават назва для будучай краіны — Паданія. Ліга — адзін з самых уплывовых палітычных гульцоў на італьянскай палітычнай арэне, яна неаднойчы ўваходзіла ў склад ураду краіны. Зараз Паўночная ліга — адзін з самых жорсткіх апанэнтаў палітыкі эканоміі прэм’ера Марыё Монці і адзін з самых рэзкіх крытыкаў Эўразьвязу.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG