Лінкі ўнівэрсальнага доступу

Класкоўскі: Імпэратыў самавыжываньня падштурхоўвае да далейшай гульні на заходнім вэктары


Аляксандар Класкоўскі

Аляксандар Класкоўскі

Рада Эўразьвязу на сёньняшнім пасяджэньні міністраў замежных спраў адмяніла большую частку санкцый супраць беларускага рэжыму. Ці надоўга захаваецца прымірэньне паміж Брусэлем і Менскам?

На гэтае пытаньне карэспандэнта Свабоды палітоляг Аляксандар Класкоўскі адказаў так:

«Ужо быў досьвед адлігі ў дачыненьнях паміж Менскам і Брусэлем у 2008, 2010 гадах, і той экспэрымэнт скончыўся з адмоўным вынікам. Цяпер, дарэчы, кіраўнік польскай дыпляматыі Вашчыкоўскі кажа пра экспэрымэнт Эўропы ў дачыненьні да Беларусі. Пабачым. Бо рэжым па сутнасьці паводле сваіх інстынктаў не зьмяніўся, але рамка зьмянілася — і эканамічная, і зьнешнепалітычная. Бо выпрацаваны эканамічны рэсурс рэжыму і, адрозна ад ранейшых часоў, Масква не гатовая даваць такія шчодрыя субсыдыі. Да таго ж яна прыціскае палітычнымі пытаньнямі. Тут на першым пляне пытаньне разьмяшчэньня авіябазы. І наогул пасьля Крыма беларускае кіраўніцтва прымерыла на сябе сцэнар зялёных чалавечкаў. Гэта прывяло не да нейкага перараджэньня поглядаў, лібэралізацыі мысьленьня беларускага начальства і найперш Аляксандра Лукашэнкі, але проста нават імпэратыў самавыжываньня падштурхоўвае да далейшай гульні на заходнім вэктары».

Паводле Аляксандра Класкоўскага, стымул працягваць гульню з Захадам у рэжыму захоўваецца.

«Бо было б зусім недарэчна, зьняўшы нарэшце санкцыі, столькі ўклаўшы ў гэта сіл (тут трэба аддаць належнае ведамству Макея — усё, што маглі, беларускія дыпляматы зрабілі, па максымуме скарысталі ўкраінскі чыньнік), пасьля гэтага пачаць вакханалію новых рэпрэсій было б нелягічна, недарэчна, ды і душыць няма асабліва каго, бо пакуль няма моцных выступленьняў. Па другое, мы бачым, што вельмі вялікая патрэба ў зьнешнім фінансаваньні. А якраз пасьля зьняцьця санкцый ёсьць шанец атрымаць доступ да фінансавых мэханізмаў ЭЗ, павышаюцца шанцы на крэдыт МВФ. То бок тут вялікае поле для гульні і з боку заходнікаў. Важна, каб Брусэль усё ж такі накінуў беларускім уладам нейкі варыянт дарожнай мапы, каб няхай па мілімэтры, але каб усё ж нейкія зьмяненьні ва ўнутранай палітыцы, эканоміцы беларускія ўлады праводзілі».

Паводле Класкоўскага, цяперашняе рашэньне ЭЗ — гэта ня горшы варыянт разьвіцьця падзей.

«Чым мацнейшыя дачыненьні Беларусі з Эўропай, нават пры цяперашнім недэмакратычным рэжыме, тым большыя шанцы на захаваньне нашай незалежнасьці і на тое, што ў пэрспэктыве перад Беларусьсю адкрыецца эўрапейскі шлях. Ну а палітычныя зьмены ў краіне — гэта найперш справа саміх беларусаў».

Паказаць камэнтары

XS
SM
MD
LG