Старшыня абласной арганізацыі Аб’яднанай грамадзянскай партыі Ўладзімер Шанцаў не дамогся звальненьня кіраўніка магілёўскай друкарні. Паводле партыйца, кіраўнік гэтага прадпрыемства ўвёў цэнзуру на друк агітацыйных матэрыялаў апазыцыйных кандыдатаў у дэпутаты Палаты прадстаўнікоў.
Шанцаў настойваў: па віне друкарні ён і ягоны аднапартыец Сяргей Смалякоў змарнавалі шэсьць агітацыйных дзён перадвыбарчай кампаніі, бо адразу не памножылі ўлётак. Партыйны актывіст паскардзіўся старшыні аблвыканкаму Ўладзімеру Даманеўскаму, каб той звольніў кіраўніка друкарні.
«Кіраўнік друкарні стварыў у калектыве атмасфэру страху. Цэнзуры не павінна быць у друкарні», — казаў Уладзімер Шанцаў, дасылаючы скаргу ў аблвыканкам.
Нагодай для канфлікту партыйнага актывіста з друкарняй сталася заява супрацоўніцы, якая прымала замову ад яго на памнажэньне ўлётак, што гэтую паслугу выканаюць пасьля ўзгадненьня агітацыйнага тэксту з акруговай выбарчай камісіяй.
«Мы ня першы раз праходзім перадвыбарчую кампанію, таму ведаем, хто і што піша», — тлумачылі сваю пазыцыю супрацоўнікі прадпрыемства.
Такую пазыцыю партыйны актывіст расцаніў як цэнзуру.
У лісьце з аблвыканкаму не згадалі кіраўніка друкарні, але далі зразумець Шанцаву, што яго прэтэнзіі беспадстаўныя.
«Вы і Смалякоў пісьмова зьвярнуліся з заявай у друкарню, каб вам надрукавалі агітацыйныя ўлёткі... Па аплаце заяўкі іх выдрукавалі і перадалі вам і Смалякову. Такім чынам, умовы ў адпаведнасьці з дамоваю па аказаньні паслуг па друку агітацыйных улётак друкарняй былі выкананыя», — адпісаў Шанцаву намесьнік старшыні аблвыканкаму Валеры Малашка.
У лісьце партыйца паінфармавалі, што замова выконваецца на працягу пяці дзён ад моманту яе падачы.
«Такія адказы раней публікавалі ў сатырычных часопісах. Чыноўнікі зрабілі выгляд, што нічога не адбылося, — камэнтуе адказ з аблвыканкаму Ўладзімер Шанцаў.
«Гэта дужа цяжка камэнтаваць, бо такая адпіска з рубрыкі „Знарок не прыдумаеш!“, — дадае актывіст. — Адказ не па сутнасьці. Я ім пра адно, а яны мне пра другое. Маўляў выпіце валяр’янкі і супакойцеся».
Ва ўлётках, паводле Шанцава, самая крамольная фраза была — «Уладу трэба мяняць, як падгузьнікі».
