Лінкі ўнівэрсальнага доступу

logo-print

Саборны мячэт адкрылі ў Менску. Пасьля 19 год будоўлі


Саборны мячэт урачыста адкрылі ў Менску. Сымбалічную стужку перарэзалі прэзыдэнты Беларусі і Турэччыны. Гэта першы саборны мячэт у сталіцы Беларусі. Ён будаваўся з 1997 году.

Першы камень у падваліны саборнага мячэту быў закладзены ў 1997 годзе. Будоўля ня раз перапынялася. Толькі ў ліпені 2016 году будынак быў афіцыйна здадзены.

Адкрыцьцё мячэту — гістарычная падзея для мусульманаў краіны і ўсяго беларускага народу, лічыць старшыня Мусульманскага рэлігійнага абʼяднаньня ў Беларусі муфцій Абу-Бекір Шабановіч.

«Яна ў тым ліку стане сымбалем сяброўства беларускага і турэцкага народаў», — перадае словы Рэджэпа Таіпа Эрдагана БЕЛТА.

У залі мячэту можа зьмясьціцца больш за 1,5 тысячы вернікаў. На цокальным паверсе — заля на 250 месцаў для прэс-канфэрэнцыяў і адукацыйных праграмаў. Таксама тут — два санітарна-гігіенічныя блёкі, памяшканьні абмывацца перад малітвай, адміністрацыйныя кабінэты, бібліятэка для масавага карыстаньня.

Малітоўная заля падчас завяршэньня будаўніцтва ўлетку 2016 году

Малітоўная заля падчас завяршэньня будаўніцтва ўлетку 2016 году

Першапачаткова будоўлю новага мячэту ў Менску фінансавала Саудаўская Арабія, на апошніх этапах — Упраўленьне па справах рэлігіі Турэцкай Рэспублікі.

Паказаць камэнтары

XS
SM
MD
LG