Лінкі ўнівэрсальнага доступу

Расьсьледаваньне справы Захаранкі працягнулі яшчэ на тры месяцы. «Сьледзтва не вядзецца», — лічыць Алег Воўчак


Партрэт Юрыя Захаранкі

Партрэт Юрыя Захаранкі

Сьледчы камітэт зноў працягнуў расьсьледаваньне забойства экс-міністра ўнутраных спраў Юрыя Захаранкі, гэтым разам на тры месяцы — да 24 сьнежня.

Пра гэта паведаміў праваабаронца Алег Воўчак, які атрымаў ліст са Сьледчага камітэту.

Ці азначае падаўжэньне справы, што расьсьледаваньне вядзецца і будзе нейкі вынік? На гэтае пытаньне карэспандэнта Свабоды Алег Воўчак, які прадстаўляе інтарэсы сямʼі Захаранкі, адказаў так:

«Ужо баліць язык штогод пра гэта казаць: канечне, сьледзтва не вядзецца. Мы ўжо цягам трох апошніх тыдняў вядзем праект „Беларуская праўда“ і выстаўляем усе матэрыялы па тэме зьніклых. Гэтыя справы былі ўжо расьсьледаваныя ў 2001 годзе. Засталося толькі прадʼявіць абвінавачаньне і справу накіраваць у суд. Таму тое, што расьсьледаваньне зноў працягнулі, — гэта толькі зацягваньне гэтай справы. І пра гэта ў 2010 годзе падчас беларуска-расейскай сваркі казаў нават расейскі прэзыдэнт Дзьмітры Мядзьведзеў, што за дзесяць гадоў час ужо расьсьледаваць гэтыя справы. Таму тут ужо ўсё, што можна — усё было расьсьледавана. Магчыма, калі скончыцца прэзыдэнцтва Лукашэнкі, тады і будзе расьсьледаваная справа».

Алег Воўчак

Алег Воўчак

Ці зьявілася нейкая новая інфармацыя ў грамадзкім расьсьледаваньні зьнікненьня Юрыя Захаранкі?

«Грамадзкая камісія працуе, але нейкай новай інфармацыі, апроч той, якую мы сабралі за мінулыя гады, няма. І ня зьявіцца. Зноў жа мы вяртаемся да 2001 году, і для нас усё ясна, хто і якім чынам ліквідоўваў палітыка. І цяпер справа за пракуратурай і судом».

Юры Захаранка зьнік увечары 7 траўня 1999 году па дарозе дадому ў раёне Магілёўскай вуліцы ў Менску. Справа па факце яго забойства было распачатая 17 верасьня 1999 году, але дагэтуль не завершаная. Расьсьледаваньне акалічнасьцяў зьнікненьня Захаранкі знаходзіцца на кантролі Камітэту ААН па правах чалавека.

XS
SM
MD
LG