Лінкі ўнівэрсальнага доступу

Правацэнтрысты пойдуць пікетаваць Белдзяржтэлерадыё


Кааліцыя «Правы цэнтар», у якую ўваходзяць Абʼяднаная грамадзянская партыя, рух «За свабоду» і дагэтуль афіцыйна не зарэгістраваная, нягледзячы на шэсьць спробаў, партыя Беларускай хрысьціянскай дэмакратыі, 1 верасьня выведзе сваіх актывістаў на акцыю за свабоду слова. Акцыя пачнецца каля ЦУМа і скончыцца на вуліцы Макаёнка, дзе месьцяцца рэдакцыі дзяржаўных электронных сродкаў масавай інфармацыі.

Пра гэта сёньня паведамілі на супольнай прэсавай канфэрэнцыі прадстаўнікі «Правага цэнтру». У прыватнасьці, першы намесьнік старшыні руху «За свабоду» Юрась Губарэвіч, які балятуецца ў Каліноўскай выбарчай акрузе, заявіў:

«Мы пачнём акцыю ад ЦУМа пад лёзунгам „Эўрапейскі выбар для Беларусі“. А затым уздоўж галоўнага праспэкту будзем рухацца да будынку Белдзяржтэлерадыё. Уся гэтая тэрыторыя трапляе ў межы маёй акругі. І таму праз кожныя 100 мэтраў будзем ладзіць пікеты. Скончым акцыю з патрабаваньнем свабоды слова, роўных умоваў для праўладных і апазыцыйных палітыкаў. Гэта несправядліва, калі прадстаўнік апазыцыі атрымлівае эфір усяго на 5 хвілін усяго адзін раз на чатыры гады падчас парлямэнцкіх выбараў».

Юрась Губарэвіч
Юрась Губарэвіч

«Дэбаты на тэлебачаньні працягам усяго 5 хвілін не назавеш нават клаўнадай, бо клоўн на арэне і той мае больш часу, — заявіла прадстаўніца АГП Ганна Красуліна. — Ведаеце, я доўга думала, як назваць гэта, і, шчыра прызнаюся, не знайшла адпаведнага слова».

Удзельнікі прэсавай канфэрэнцыі адзначылі, што сёлетнія выбары, насуперак запэўніваньням уладаў, ня сталі ні свабоднымі, ні справядлівымі.

Зьлева направа: сустаршыня аргкамітэту ў справе стварэньня партыі Беларуская хрысьціянская дэмакратыя Віталь Рымашэўскі, сябра палітрады Абʼяднанай грамадзянскай партыі Ганна Красуліна і першы намесьнік старшыні руху «За свабоду» Юрась Губарэвіч
Зьлева направа: сустаршыня аргкамітэту ў справе стварэньня партыі Беларуская хрысьціянская дэмакратыя Віталь Рымашэўскі, сябра палітрады Абʼяднанай грамадзянскай партыі Ганна Красуліна і першы намесьнік старшыні руху «За свабоду» Юрась Губарэвіч

Адказваючы на пытаньне Свабоды, ці адчулі правацэнтрысты плён ад супольнай выбарчай кампаніі, усе сказалі адназначна: так. У прыватнасьці, сустаршыня аргкамітэту ў справе стварэньня партыі БХД Віталь Рымашэўскі заявіў:

«Плён абсалютна відавочны. Асабліва гэта адчуваецца ў рэгіёнах. Напрыклад, у Віцебску да нас далучыліся і БНФ, і сацыял-дэмакраты. Урэшце мы паказалі людзям, што апазыцыя, няхай і ня ў поўным складзе, але можа і абʼяднацца, і супольна працаваць. Хочам паказаць гэта і падчас кампаніі назіраньня».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG