Дзяржаўны сакратар ЗША Рэкс Тылерсан пацьвердзіў, што Вашынгтон падтрымлівае NATO. Ён зрабіў гэтую заяву на наступны дзень пасьля таго, як прэзыдэнт ЗША Дональд Трамп у сваім выступе ў Кангрэсе выказаў меркаваньне, што саюзьнікі па NATO «пачынаюць» выконваць свае фінансавыя абавязаньні што да вайсковых выдаткаў.
У адмысловай заяве Тылерсана, распаўсюджанай Дзяржаўным дэпартамэнтам, гаворыцца, што адміністрацыя Трампа будзе «надалей падтрымліваць палітыку і інстытуты, якія захоўваюць амэрыканцаў у бясьпецы, у тым ліку трывалую NATO, дзе саюзьнікі выконваюць свае абавязкі».
Тылерсан сказаў, што Вашынгтон «будзе працаваць з саюзьнікамі, каб супрацьстаяць краінам, якія пагражаюць сваім суседзям або дэстабілізуюць свае рэгіёны». Паводле яго словаў, «амэрыканская зьнешняя палітыка павінна прасоўваць нашы асноўныя каштоўнасьці свабоды, дэмакратыі і стабільнасьці».
У сваім выступе перад абедзьвюма палатамі Кангрэса 28 лютага прэзыдэнт ЗША Дональд Трамп заявіў: «Мы чакаем, што нашы партнэры — у NATO, на Блізкім Усходзе або ў Ціхім акіяне — прымуць непасрэдную і значную ролю ў стратэгічных і ваенных апэрацыях і заплацяць справядлівую частку цаны гэтага».
Трамп сказаў: «Цяпер, на падставе нашых вельмі моцных і адкрытых дыскусіяў, яны пачынаюць рабіць менавіта гэта».
«Насамрэч, я магу вам сказаць, што грошы пайшлі», — заявіў Трамп.