Лінкі ўнівэрсальнага доступу

Пётар Клюеў ідзе на адбор «Эўрабачаньня-2017», «каб нагадаць пра беларускую мову»


Гурт «Амплітуда сьмеласьці» і Пётар Клюеў на ўкраінскім тэлешоў «X-фактор»

Гурт «Амплітуда сьмеласьці» і Пётар Клюеў на ўкраінскім тэлешоў «X-фактор»

Адмыслова для ўдзелу ў конкурсе музыка разам з паэтам Алесем Сьнегам напісаў песьню «Чаму?».

У камэнтары Свабодзе Пётар Клюеў сказаў, што лічыць сваёй галоўнай мэтай «нагадаць пра беларускую мову».

«Я яшчэ ня вырашыў, у чым буду выступаць. Звычайна ў маім адзеньні прысутнічае герб „Пагоня“. Магчыма, на адборы я абмяжуюся толькі вышыванкай, яшчэ ня вырашыў. У любым разе, мая мэта — паказаць гэтай тусоўцы, што ёсьць беларуская мова, што ёсьць нашы нацыянальныя сымбалі», — сказаў музыка.

Ён таксама адзначыў, што выступ па-беларуску вельмі добра ацанілі б ва Ўкраіне, дзе пройдзе міжнародны конкурс «Эўрабачаньне-2017»:

«Ёсьць меркаваньне, што на „Эўрабачаньні“ найбольшыя шанцы маюць песьні на ангельскай мове. Але былі выпадкі, калі перамагалі песьні на нацыянальных мовах, напрыклад, на сэрбскай. Летась пераможца Джамала сьпявала па-ангельску і на мове крымскіх татараў. Атрымліваецца, што часам не спрацоўваюць стандарты, якія павінны ўсім падабацца, а перамагае тое, што зроблена шчыра і гэтым чапляе. Я думаю, у выпадку, калі мне давядзецца ехаць у Кіеў, то ўкраінцы дадуць мне 12 балаў. Беларускамоўная песьня ад беларускага выканаўцы — гэта ім дакладна спадабаецца».

Адбор на «Эўрабачаньне» адбудзецца 30 лістапада ў Белтэлерадыёкампаніі.

Пётар Клюеў — беларускі музыка і шоўмэн. 2 кастрычніка ён разам з гуртам «Амплітуда сьмеласьці» (у склад якога ўвайшлі ўдзельнікі Trubetskoy Руслан Уладыка і Аляксандар Старажук, а таксама басіст Сяргей Адамовіч) выступіў на ўкраінскім тэлешоў «X-фактор».

Гурт прайшоў у наступны этап конкурсу зь песьнямі Queen «Crazy Little Thing Called Love» і «Асьцярожна, лістапад» на верш Генадзя Бураўкіна. Клюеў і ўсе ўдзельнікі гурту «Амплітуда сьмеласьці» выступалі ў цішотках з «Пагоняй». У залі падчас выступу лунаў бел-чырвона-белы сьцяг.

Паказаць камэнтары

XS
SM
MD
LG