Лінкі ўнівэрсальнага доступу

Пікеты апазыцыйнага кандыдата атакуюць разьюшаныя кабеты


Лоеўскі РАУС

Лоеўскі РАУС

Міліцыянты затрымалі жанчыну, якая ў Лоеве абражала ўдзельнікаў пікету кандыдата ў дэпутаты Аляксея Атрошчанкі.

Кандыдат у дэпутаты ад Абʼяднанай грамадзянскай партыі па Хойніцкай выбарчай акрузе № 47 Аляксей Атрошчанка з даверанай асобай Кастусём Жукоўскім ладзіў у Лоеве агітацыйны пікет. На вуліцы жыхарам паказвалі дакумэнтальны фільм пра мясцовую міліцыю, зьняты камэрай відэаназіраньня самога Лоеўскага РАУС.

У фільме распавядаецца, што 21 чэрвеня першы намесьнік начальніка лоеўскай міліцыі Ўладзімер Маджара разам з участковымі Андрэем Хічовым і Канстанцінам Карнавушанкам чынілі гвалт над журналістам-фрылансэрам Жукоўскім, затрыманым падчас відэаздымак мясцовага камбінату будматэрыялаў. Да затрыманьня спрычыніўся і сам начальнік міліцыі Ўладзімер Бухаўцоў.

«Пікет доўжыўся каля трох гадзін. Расказвалі людзям, што па Канстытуцыі не чыноўнікі, а народ — сапраўдны носьбіт улады. У нейкі момант на Кастуся Жукоўскага наляцела разьюшаная кабета, пачала абражаць. Выглядала гэта звычайнай правакацыяй. Мы патэлефанавалі ў міліцыю, але пакуль прыехаў нарад, кабета села ў белы „Мэрсэдэс“ № 17-99 і зьнікла. Праз колькі часу яна вярнулася, і міліцыянты, якія заставаліся на пікеце, затрымалі яе і павезьлі ў аддзел. Думаю, у хуткім часе мы дазнаемся, хто яна такая і чаму агрэсіўна паводзіла сябе», — сказаў кандыдат у дэпутаты Аляксей Атрошчанка.

Гэта, дарэчы, ня першы агітацыйны пікет, які атакуюць разьюшаныя кабеты. Некалькі дзён таму ў Хойніках, дзе месьціцца акруговая камісія № 47, мясцовая пэнсіянэрка таксама накінулася на агітацыйны пікет Атрошчанкі.

«Прэзыдэнт у нас як чалавек. А вы падонкі! Прэч адсюль, гады!» — крычала бабуля.

Потым яна павярнулася сьпінаю да пікету і, задраўшы спадніцу, стала трэсьці майткамі.

Пэнсіянэрка ажно выйшла на праезную частку вуліцы, працягваючы праклёны. Аўтамашыны спыняліся, назіраючы перадвыбарчую мізансцэну.

Паказаць камэнтары

XS
SM
MD
LG