Лінкі ўнівэрсальнага доступу

«Мы пяць гадзін у мяне ў кабінэце стаялі перад глёбусам». 5 цытат Лукашэнкі з паездкі ў Кітай


Аляксандар Лукашэнка са старшынём КНР Сі Цзіньпінам

Аляксандар Лукашэнка са старшынём КНР Сі Цзіньпінам

30 верасьня завяршыўся дзяржаўны візыт Аляксандра Лукашэнкі ў Кітай — ягоны самалёт ужо вылецеў у Менск з аэрапорту Пэкіна. Паведамляецца, што па выніках візыту быў падпісаны пакет пагадненьняў і мэмарандумаў аб супрацоўніцтве дзьвюх краінаў у розных сфэрах.

Свабода падабрала найбольш цікавыя выказваньні Аляксандра Лукашэнкі зь ягонай кітайскай паездкі (цытаты паводле БЕЛТА).

«Крыніца ўсіх крызісаў — у культываваньні правоў і свабодаў чалавека»

Выступаючы перад студэнтамі Пэкінскага ўнівэрсытэту, Аляксандар Лукашэнка расказаў, у чым, на ягоную думку, глыбінная крыніца ўсіх крызісаў:

«Я ўжо казаў, будучы ў ААН, што глыбінная крыніца ўсіх крызісаў крыецца ў штучным несувымерным культываваньні індывідуальных правоў і свабодаў чалавека на шкоду грамадзкім інтарэсам. Пад прыкрыцьцём лёзунгу абароны правоў чалавека зрынаюцца ўрады, руйнуюцца дзяржавы, арганізуюцца ваенныя інтэрвэнцыі. Па сутнасьці, насаджваюцца хаос і анархія са шматлікімі чалавечымі ахвярамі. Але ж нават шчыра добрыя мэты не павінны дапускаць непрыдатных сродкаў іх дасягненьня».

«Будзе магутны і моцны Кітай — будзе сувэрэнная і незалежная Беларусь»

Аляксандар Лукашэнка сказаў кітайскім студэнтам, што незалежнасьць Беларусі залежыць ад магутнасьці Кітая як гаранта шматпалярнасьці сьвету:

«Будзе магутны і моцны Кітай — будзе сувэрэнная і незалежная Беларусь. Таму што гэта наш сябар, на плячо якога мы заўсёды зможам абаперціся».

«Ён памятае да коскі ўсю гэтую размову»

Аляксандар Лукашэнка расказаў і пра сваё знаёмства зь Сі Цзіньпінам. Знаёмства адбылося яшчэ тады, калі той на пасадзе намесьніка старшыні КНР наведаў зь візытам Беларусь.

«Мы пяць гадзін у мяне ў кабінэце стаялі перад глёбусам і абмяркоўвалі сусьветныя праблемы. Размова была абсалютна шчырая. Кітайцы — людзі стрыманыя. Яны доўга могуць ісьці, але калі прымуць рашэньне, то пойдуць. Так атрымалася зь Сі Цзіньпінам. Я бачу, што, стаўшы кіраўніком такой імпэрыі, як Кітай, ён памятае да коскі ўсю гэтую размову ў кабінэце».

«У нас тады занадта шмат было лібэралаў»

Аляксандар Лукашэнка расказаў прэмʼеру Дзяржсавету Кітая Лі Кэцяну, што, будучы дэпутатам Вярхоўнага Савету, прапаноўваў выкарыстаць кітайскі досьвед у разьвіцьці Беларусі. «Але ў нас тады занадта шмат было лібэралаў, якія абралі заходні шлях разьвіцьця», — сказаў ён.

«Інтуітыўна яшчэ тады — да свайго прэзыдэнцтва — я зразумеў, што будучыня нашай плянэты за Кітаем. Як бачыце, я не памыліўся», — сказаў Лукашэнка.

«У цэнтры Эўропы вы маеце пляцдарм для прасоўваньня сваіх інтарэсаў»

На сустрэчы са старшынём пастаяннага камітэту Ўсекітайскага сходу народных прадстаўнікоў Чжан Дэцзянам Аляксандар Лукашэнка паабяцаў прадстаўляць кітайскія інтарэсы ў Эўропе:

«Вы павінны быць упэўнены, што ў цэнтры Эўропы вы маеце пляцдарм для прасоўваньня сваіх інтарэсаў. Вы можаце на нас разьлічваць. Мы будзем рабіць усё, каб вашы інтарэсы былі прадстаўленыя на эўрапейскім кантынэнце».

Паказаць камэнтары

XS
SM
MD
LG