Лінкі ўнівэрсальнага доступу

«Калі падвысяць пэнсійны ўзрост, давядзецца людзей з працы забіраць адразу на могілкі» — жыхарка Гомеля


«Улада сьцьвярджае, што ў Беларусі неабходна падвышаць узрост выхаду на пэнсію. Як вы ставіцеся да гэтага?» На пытаньне адказваюць жыхары Гомеля.

Мужчына перадпэнсійнага веку: «З аднаго боку, станоўча, зь іншага — адмоўна. Станоўча, бо ўжо няма каму працаваць, няма каму адлічваць грошы ў пэнсійны фонд. Зь іншага боку, многія й да шасьцідзесяці гадоў не жывуць і не дапрацоўваюць».

42-гадовая жанчына: «З маім здароўем я да пэнсіі не дажыву, бо ў мяне ўжо інваліднасьць 3 групы».

Студэнт: «Хутчэй кепска, чым добра: ня ўсе людзі дажываюць да такога ўзросту. Думаю, што гэта будзе адчувальна, калі дабавяць пяць гадоў».

Пэнсіянэр: «Калі няма чым плаціць пэнсіі, то, відаць, давядзецца падымаць пэнсійны ўзрост».

52-гадовая жанчына: «Я думаю, што рабіць гэтага ня варта, бо давядзецца людзей з працы забіраць адразу на могілкі».

Студэнт-пяцікурсьнік: «Не хацелася б, каб падвышалі ўзрост. Але паколькі ў нас мала працаўнікоў — павінна, калі не памыляюся, быць мінімум трое працоўных на аднаго пэнсіянэра, а нас цяпер двое, — то, магчыма, і трэба». (Сьмеючыся, дадае:) «Нараджаць трэба больш і ствараць больш працоўных месцаў».

Жанчына ў гадах: «Адмоўна, бо ў нас нізкі ўзровень жыцьця. Людзі мала жывуць. Трэба, каб працавала моладзь — гэта найперш. Няма працы цяпер многім, і моладзі ў першую чаргу. Людзі, якія дасягнулі пэнсійнага ўзросту, няхай працуюць, калі хочуць. У іх трэба, каб была і пэнсія, і заробак. У такім разе палепшыцца ўзровень жыцьця».

Мужчына пэнсійнага ўзросту: «Магчыма, крыху й можна. Размовы ж ідуць пра пару гадоў».

Мужчына спартовага складу: «Асабіста я — супраць. Мне й бяз працы хапае занятку. У мяне байдарка ёсьць. Я сплавы раблю па рэчках Беларусі. Мне цікава і бяз працы».

Жанчына перадпэнсійнага веку: «Адмоўна. Думаю, што дастаткова й цяперашняга ўзросту, каб зарабіць сабе на старасьць».

Мужчына сярэдніх гадоў: «Проста мы не дажывём да яго».

Малады мужчына: «Я думаю, што ня варта падвышаць. Людзі ўсё-ткі зношваюцца. Думаю, што гэта адмоўна адаб’ецца і на прадукцыйнасьці працы, і на здароўі людзей».

Пэнсіянэрка: «У нашых умовах чалавек ня вытрымае, калі дабавіць яму пэнсійны ўзрост. Багатым не зразумець, як простыя людзі жывуць. Яны ня вытрымаюць. Цяпер і без таго працы няма. Трэба, каб усім была праца, а ў нас яе бракуе, у тым ліку й для маладых. Людзі пакутуюць бяз працы, душа на нітачцы ў іх трымаецца».

Паказаць камэнтары

XS
SM
MD
LG