Журналіст Agence France Presse апублікаваў відэазапіс агароджанай тэрыторыі расейскай вайсковай базы з зэнітна-ракетным комплексам «Панцирь-С1» у сырыйскай Пальміры, перадае Al Masdar News.
Як сьцвярджае выданьне, Расея ператварыла частку гораду ў вайсковую базу і пункт падрыхтоўкі апэрацыяў супраць тэрарыстаў. Пакуль расейскіх самалётаў у мясцовым вайсковым аэрапорце не заўважана, але, піша Al Masdar News, можна чакаць зьяўленьня мноства самалётаў СУ і МІ.
Аналітыкі кажуць, што новая база дэманструе намер Расеі, якая падтрымлівае ў сырыйскай грамадзянскай вайне ўрад Башара Асада, пашырыць зону вядзеньня баявых дзеяньняў да гораду Рака, фактычнай сталіцы тэрарыстаў «Ісламская дзяржавы», і горада Дэйр-эз-Зор.
Расея дапамагла сырыйскім уладам адбіць Пальміру ў баевікоў у канцы сакавіка 2016 года, ужо пасьля таго, як асноўная частка кантынгенту Расеі мусіла пачаць выхад з Сырыі (але засталася). Amnesty International абвінавачвала Расею ў ваенных злачынствах у Сырыі — расейскія вайсковыя самалёты нібы наўмысна наносілі ўдары па мірных жыхарах і ратавальніках.
