Лінкі ўнівэрсальнага доступу

У Менску прэмʼеры ЭАЭС не змаглі ўзгадніць Мытны кодэкс. Працягнуць у Маскве


Кіраўнікі ўрадаў Эўразійскага эканамічнага саюзу вернуцца да спрэчных пунктаў Мытнага кодэксу ў сярэдзіне лістапада ў Маскве.

Пра гэта сказаў у Менску старшыня Эўразійскай міжурадавай рады, прэмʼер-міністар Казахстану Бакытжан Сагінтаеў, паведамляе БЕЛТА.

«На пачатак дня ў нас не было ўзгоднена 10 пунктаў. Па выніках працы ў вузкім складзе нам удалося дамовіцца па 4 пунктах. Адзін — у рэзэрве. Я думаю, па ім таксама будзе дасягнута дамоўленасьць. У выніку ў нас застаецца 5 пунктаў, якія зьвязаныя з працай свабодных эканамічных зон», — цытуе tut.by Сагінтаева.

Прэмʼер-міністар Казахстану выказаў надзею, што ў сярэдзіне лістапада кіраўнікі ўрадаў зьбяруцца яшчэ раз у Маскве і паспрабуюць ліквідаваць усе рознагалосьсі.

Пасяджэньне прэмʼераў пяці краін у вузкім складзе замест плянаваных 55 хвілін цягнулася каля трох гадзін. Як сказаў прэмʼер-міністар Расеі Дзьмітры Мядзьведзеў, была гарачая дыскусія з нагоды новага Мытнага кодэксу ЭАЭС. Аднак бакі ўзгаднілі толькі палову праблемных момантаў.

Падчас пашыранага пасяджэньня рады прэмʼер-міністар Беларусі Андрэй Кабякоў заявіў, што Беларусь выступае за стварэньне роўных умоў для субʼектаў гаспадараньня ў ЭАЭС.

«Калі не ліквідуем барʼеры, якія існуюць, ня створым унутры саюзу роўныя ўмовы для субʼектаў гаспадараньня, саюз наш будзе слабым», — цытуе БЕЛТА прэмʼер-міністра.

Кабякоў заклікаў краіны ЭАЭС паздымаць барʼеры для доступу на рынкі сельгаспрадукцыі.

Паводле кіраўніка беларускага ўраду, у краінах ЭАЭС рэгулярна прымаюцца на нацыянальных узроўнях пратэкцыянісцкія рашэньні, якія супярэчаць духу саюзу. Маўляў, прыклады добра вядомыя.

«Ня так актыўна, як хацелася б, ідзе рух насустрач у пытаньнях рэалізацыі ўзгодненай сельскагаспадарчай палітыкі, зьняцьця барʼераў па доступе на рынак, — сказаў Кабякоў. — Рэгулярна да нас ва ўрад паступаюць запыты прадпрыемстваў і арганізацыяў па асаблівасьцях працы на рынках краін саюзу ў сучасных умовах, доступе да дзяржаўных закупак, арганізацыі транзыту і шмат якіх іншых тэмах».

Прэмʼер Беларусі дадаў, што саюз ствараўся дзеля таго, каб праблемаў ва ўзаемным гандлі не было.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG