Лінкі ўнівэрсальнага доступу

logo-print

Пад санкцыі трапілі ўжо 5 камэрцыйных банкаў. Заіка: Яны слабенькія


Тры з гэтых банкаў Нацбанк пазбавіў ліцэнзіяў, яшчэ ў двух дзейнасьць ліцэнзіяў была прыпынена.

Сёньня Нацбанк прыпыніў да 17 верасьня дзеяньне ліцэнзіі ЗАТ «Норд Еўрапеан Банк» («Н.Е.Б. Банк») на ажыцьцяўленьне асобных банкаўскіх апэрацыяў (па прыцягненьні грашовых сродкаў юрыдычных асобаў на рахункі і ва ўклады, адкрыцьці і вядзеньні банкаўскіх рахункаў юрыдычных асобаў, ажыцьцяўленьні разьліковага і касавага абслугоўваньня фізычных асобаў ды інш.).

«Дадзенае рашэньне прынята ў сувязі зь невыкананьнем ЗАТ „Н.Е.Б. Банк“ лiцэнзiйных патрабаваньняў да велічыні нарматыўнага капіталу банку, нявызначанасьцю пэрспэктыў па яго нарошчваньні, невыкананьнем іншых ліцэнзійных патрабаваньняў, вызначаных Банкаўскім кодэксам Рэспублікі Беларусь», — тлумачыцца ў паведамленьні Нацбанку.

На мінулым тыдні Нацбанк прыняў рашэньне адклікаць ліцэнзіі ў ЗАТ «БІТ-Банк» і ЗАТ «ІнтэрПэйБанк», а таксама прыпыніў да 6 жніўня дзеяньне ліцэнзіі ЗАТ «Эўрабанк» на ажыцьцяўленьне асобных банкаўскіх апэрацыяў.

Яшчэ 18 сакавіка 2015 году Нацбанк пазбавіў ліцэнзіі ЗАТ «Дэльта-банк».

Сёньня на сайце Нацбанку апублікавалі адмысловы прэс-рэліз, дзе тлумачацца прычыны такой «зачысткі» банкаўскай прасторы. Як адзначаюць у Нацыянальным банку, яшчэ ў 2012 годзе было прынята рашэньне павялічыць мінімальны памер нарматыўнага капіталу банкаў да сумы, эквівалентнай 25 млн. эўра, зь пераходным пэрыядам да 1 студзеня 2015 году. Большасьць беларускіх банкаў змаглі выканаць новыя патрабаваньні. Тры банкі (ЗАТ «Трастбанк», ЗАТ «БТА Банк» і ЗАТ «Банк ББМБ») падалі ў Нацыянальны банк «рэалістычныя пляны па ліквідацыі бліжэйшым часам дапушчанага парушэньня», і ім далі дадатковы час для рэалізацыі заплянаваных мерапрыемстваў. Тыя ж банкі, якія на сёньняшні дзень трапілі пад санкцыі Нацбанку, даць пераканаўчых плянаў па нарошчваньні нарматыўнага капіталу не змаглі.

«Меры, якія прымаюцца Нацыянальным банкам, накіраваныя на ўмацаваньне банкаўскай сыстэмы Рэспублікі Беларусь і забесьпячэньне яе бясьпечнага функцыянаваньня. У цэлым стабільнасьць банкаў і іх здольнасьць належным чынам праводзіць плацяжы і выконваць свае абавязаньні перад крэдыторамі і фундатарамі не выклікае асьцярог», — адзначаецца ў заяве.

Леанід Заіка

Леанід Заіка

Кіраўнік аналітычнага цэнтру «Стратэгія» Леанід Заіка тлумачыць рэструктурызацыю банкаўскай сфэры перш за ўсё эканамічным крызісам у Беларусі. «Зачыстка» банкаўскай прасторы ў гэтых умовах — нармальны працэс.

«Гэтыя банкі былі слабенькія. Праблема заключаецца ў тым, што яны ня могуць адказваць па даўгах насельніцтву. То бок, такія меры патрэбныя, яны эфэктыўныя. Таму ў мяне прэтэнзіяў да нашай банкаўскай сыстэмы няма, „зачыстку“ сапраўды трэба рабіць», — заявіў Свабодзе экспэрт.

Што тычыцца сытуацыі ў цэлым, то беларусам хвалявацца ня варта: буйныя банкі, асабліва дзяржаўныя, якія атрымліваюць субсыдыі і льготы, не абваляцца.

XS
SM
MD
LG