Лінкі ўнівэрсальнага доступу

«Па заробку мы адкінутыя на 5 гадоў назад», —  Барыс Жаліба


Барыс Жаліба

Барыс Жаліба

Паводле афіцыйнай статыстыкі, сярэдні заробак у студзені 2015 году склаў 6 023 200 рублёў. Гэта на 11,5 працэнта менш, чым у папярэднім месяцы, сьнежні, калі намінальны налічаны сярэднямесячны заробак склаў 6 мільёнаў 806 тысяч рублёў.

Чым можна патлумачыць такі правал? Няўжо ўлады ня маюць магчымасьцяў падвышаць намінальны заробак пасьля дэвальвацыі?

Эканаміст Барыс Жаліба тлумачыць, што сьнежань — своеасаблівы месяц, калі многія фірмы і прадпрыемствы выплачваюць «трынаццатыя заробкі», прэміі, дывідэнды ды іншае. Таму заўсёды статыстыка заробкаў у сьнежні адрозьніваецца ад іншых месяцаў.

«Але тое, што здарылася ў гэтым студзені, такое падзеньне заробку — гэтага я ня памятаю, такога не было ніколі, — кажа Жаліба. — У канцы году многія беларускія прадпрыемствы працуюць няпоўны тыдзень, у іх ужо няма рэсурсаў нават утрымліваць заробак хаця б на тым самым узроўні».

Беларусы за час шматлікіх дэвальвацыяў прызвычаіліся, што адразу пасьля падзеньня рубля ўлады імкнуцца даволі істотна падвышаць заробак у намінальным рублёвым вылічэньні. Няўжо гэтым разам будзе па-іншаму, і дэвальвацыя ня будзе спалучацца з ростам заробку ў рублях?

«Выглядае, што праблема падвышэньня заробку сёньня стаіць як ніколі востра. Нейкія рэзэрвы ўлада знойдзе, ужо ёсьць рашэньне падвысіць бюджэтнікам за люты. Але як будуць падвышаць заробкі на прадпрыемствах — я ня ведаю, гэта вельмі праблематычна. Бо прынята цьвёрдае рашэньне, каб рост заробкаў не перавышаў рост прадукцыйнасьці працы. Раней гэтага не было, і, я думаю, урад будзе трымацца гэтага»

Па выніках студзеня сярэдні беларускі заробак склаў каля 400 даляраў. Можна прыгадаць, што на выбары 2010 году Аляксандар Лукашэнка ішоў зь лёзунгам — забясьпечыць сярэдні заробак 500 даляраў. Выглядае, што ўлада зноў можа ставіць такую самую задачу.

«Так, па заробку мы адкінутыя на 5 гадоў назад. Пад узьдзеяньнем вонкавых чыньнікаў. Тоне расейская эканоміка, і мы тонем усьлед за ёй», — кажа Барыс Жаліба.

  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

XS
SM
MD
LG