28 ліпеня стала вядома, што раённыя цэнтры Краснаперакопск, Краснагвардзейскае, Кіраўскае і Савецкі атрымалі на Google Maps назвы Яны-Капу, Курман, Ісьлям-Тэрэк і Ічкі адпаведна.
Пасьля гэтага расейскі міністар сувязі Мікалай Нікіфараў прыгразіў карпарацыі Google праблемамі пры вядзеньні бізнэсу ў Расеі. Ён заявіў, што кампанія вядзе «недальнабачную палітыку» і «ставіцца няўважліва да дзейнага ў Расеі заканадаўства».
«Калі кампанія Google ставіцца настолькі няўважліва да дзейнага ў Расеі заканадаўства і назваў расейскіх населеных пунктаў, гэта не дазволіць кампаніі эфэктыўна весьці бізнэс на тэрыторыі Расеі», — сказаў Нікіфараў.
Цяпер камуністычныя назвы вернутыя.
Калі шукаць населены пункт па новай назьве, сэрвіс знаходзіць яе, але адлюстроўвае і стары варыянт. Гэта тычыцца ўкраінскай і расейскай вэрсій праграмы. Раней у кампаніі паведамлялі, што старыя назвы будуць вернутыя толькі на расейскую вэрсію сэрвісу.
5 траўня прэзыдэнт Пятро Парашэнка падпісаў прыняты раней Вярхоўнай Радай закон «Аб асуджэньні камуністычнага і нацысцкага таталітарных рэжымаў ва Ўкраіне і забароне прапаганды іх сымболікі».
Закон, у прыватнасьці, загадвае зьмяніць усе геаграфічныя назвы, якія зьвязаныя з савецкім партыйным кіраўніцтвам. Украінскі парлямэнт прыняў рашэньне перайменаваць 74 населеныя пункты на Данбасе і 75 у анэксаваным Расеяй Крыме.