Лінкі ўнівэрсальнага доступу

logo-print

Не сядаючы за стырно, жыхар Бярозаўшчыны страціў правы кіроўцы


Мікалай Шуст

Мікалай Шуст

Мікалай Шуст зь вёскі Кабакі Бярозаўскага раёну рабіў у мясцовым сельскагаспадарчым прадпрыемстве кіроўцам. Аднак яго пазбавілі правоў і працы кіроўцы, пасьля таго як ён нецьвярозы пасварыўся з жонкай.

Мікалай Шуст кажа, што ў яго здарыўся канфлікт з жонкай і суседзі выклікалі на яго міліцыю:

«У мяне быў дзень народзінаў і выходны дзень. Я выпіў, увечары выйшаў скандал з жонкай. Суседзі выклікалі ўчастковага, ён на наступны дзень завёз мяне ў міліцыю, там аформіў, засудзілі і далі дзьве базавыя штрафу. Празь нейкі час прыяжджае зноў участковы і кажа, што мушу паехаць на нейкую гутарку. Я сеў і паехаў. Ён мяне — у міліцыю, зь міліцыі — да нарколяга, у нарколяга „трубка“, зразумела ж, паказала, бо я выпіваў. На ўлік паставілі і ў Крывошын завезьлі мяне на лячэньне (у Крывошыне Берасьцейская абласная псыхіятрычная лякарня. — РС). Нас туды чалавек пятнаццаць адразу завезьлі. 10 дзён там быў, таблеткі давалі», — кажа Мікалай.

Ён працуе ў мясцовым сельгаспрадпрыемстве КУСП «Бярозаўскае». Мікалай распавёў, што калі вярнуўся, то ягоны працоўны аўтамабіль УАЗ быў ужо перададзены іншаму чалавеку, а яго прызначылі падменным кіроўцам.

«Ну і працаваў-працаваў больш за месяц, ды прыйшла папера з ДАІ — здаць пасьведчаньне кіроўцы. У сувязі з тым, што падала нарколяг у ДАІ, што я ў іх на ўліку стаю і ня маю права езьдзіць. Я паехаў да нарколяга, Надзеі Абзалімавай, кажу — дайце накіраваньне да абласнога нарколяга. А яна мне не хацела накіраваньне даваць. Сказала, што сама пашле накіраваньне ў Берасьце. Зараз панапісвае там няведама чаго», — кажа Мікалай Шуст.

Цяпер спадар Шуст ня можа працаваць кіроўцам, яго перавялі ў сьлесары:

«Кіроўцам я атрымліваў да 6 мільёнаў (недэнамінаванымі. — РС), а цяпер — толькі два. У мяне малыя дзеці, чым іх карміць? Я казаў нарколягу — што ж вы робіце? Паказваў ёй даведку, што за год адпрацаваў 334 дні кіроўцам і не было ніякіх праблемаў ніколі. Але яна і слухаць не захацела», — распавёў Мікалай Шуст.

Даведка аб тым, што Мікалай Шуст адпрацаваў 334 дні за год

Даведка аб тым, што Мікалай Шуст адпрацаваў 334 дні за год

Спадар Шуст кажа, што ДАІ ніколі не лавіла яго нецьвярозым за стырном аўто, дый у міліцыі ніколі не было «прэтэнзіяў, што валяюся п’яны пад плотам».

«Вось выйшла, што выпіў, здарыўся скандал, і адразу так пакаралі, што аж працы пазбавілі», — бядуе спадар Шуст.

Лекар-нарколяг Бярозаўскай цэнтральнай раённай лякарні Надзея Абзалімава была прызнаная найлепшым нарколягам краіны за 2014 год. Жыхары Бярозаўшчыны кажуць пра яе як пра заядлую барацьбітку з п’янствам.

Карэспандэнт Свабоды паспрабаваў папытацца ў спадарыні Абзалімавай, ці няма перагібу ў справе Мікалая Шуста, які першы раз трапіў у поле зроку праваахоўных органаў на глебе п’янкі.

Аднак на другім канцы слухаўкі журналісту адказалі:

«Надзея Пятроўна цяпер занятая. У нас цяпер РАУС, вельмі шмат людзей, давайце ператэлефануйце ў панядзелак. Цяпер няма часу размаўляць».

Справай Мікалая Шуста заняўся бярозаўскі праваабаронца Сяржук Русецкі. Спадар Русецкі кажа, што рыхтуе скаргі ў пракуратуру і галоўнаму лекару Бярозаўскай цэнтральнай раённай лякарні:

«Рыхтую скаргі ў сувязі з тым, што чалавека фактычна за адзін прывод у міліцыю — хоць ён і паводзіў сябе нядобра ў сям’і, але за адно парушэньне — адпраўляюць у Крывошын. Гэта ні ў якія вароты ня лезе. А ў выніку з-за таго, што яго паставілі на ўлік, анулявалі яго мэдычную даведку, і ён аказаўся пазбаўлены ранейшай працы. Мікалай Шуст намагаецца аднавіць свае правы, ён хоча прайсьці мэдычную камісію, каб не стаяць на ўліку і мець права на тую працу, якой займаўся раней».

Паказаць камэнтары

XS
SM
MD
LG