Сабралі самае забаўнае тут: Кацяняты, «танчыкі» і «чарнамазы сын». Топ-20 цытатаў Лукашэнкі
Якія жывёлы ёсьць у Лукашэнкі
Лукашэнка апавёў, што мае трох катоў, трох страўсаў, кітайскіх і звычайных курэй, індыкоў, трусоў (было 70 — раздаў, засталося 20), 25 качак, 10 кароў, 10 коз, 15 авечак, 7-8 коней, 4 сабакі (дзьве лайкі, лябрадор і нямецкая аўчарка). «Чалавек павінен любіць жывёл. Калі ён ня любіць — ён не чалавек», — сказаў Лукашэнка.
Пра ўвядзеньне адзінай валюты Беларусі і Расеі
«Вось кажуць пра ўвядзеньне адзінай валюты. Пытаюся, якая валюта? Расейскі рубель. А чаму не беларускі? Ладна. А эмісійны цэнтар? Расейскі. А як жа пытаньне сувэрэнітэту?», — задаў рытарычнае пытаньне Лукашэнка. Ён падкрэсьліў, што ня супраць увядзеньня адзінай валюты, але адзіная валюта павінна быць уведзена толькі на раўнапраўнай аснове.
Лукашэнка расказаў пра сваё стаўленьне да сацсетак
Лукашэнка расказаў, што не сядзіць у сацыяльных сетках і ня мае сваёй старонкі: «Я не пакутую, што гэтай старонкі няма. У гэтым пляне я не зьяўляюся паказчыкам прасунутага прэзыдэнта».
Адначасова ён прызнаўся, што спрабуе абмежаваць у карыстаньні інтэрнэтам сына Мікалая.
«У мяне адна праблема — яго адтуль вырваць», — распавёў ён.
Паводле слоў Лукашэнкі, ён ня хоча, каб у сына была старонка ў сацсетках. «Ня трэба сыну прэзыдэнта, асабліва няпоўнагадоваму, траўмаваць псыхіку з гэтымі старонкамі», — кажа Аляксандар Лукашэнка.
Лукашэнка: Я калісьці спрабаваў пісаць вершы
Лукашэнка распавёў пра тое, што цяпер у яго няма часу чытаць кніжкі.
«Я не скажу, што чытаю шмат кнігі. Больш так — іду міма стала, дзіця там чымсьці займаецца. Гляджу — кніжка ў яго. Ну я пагляджу, што ён чытае, сам яе праглядаю», — кажа ён.
«Я вельмі шмат чытаў у свой час. У прыярытэце ў мяне была гістарычная літаратура, а з мастацкай літаратуры — клясычная. „Вайна і мір“ там, „Паднятая цаліна“ ... Маса кніжак. Я калісьці спрабаваў пісаць вершы, таму я вучыўся ў нашых паэтаў — пачынаючы з Пушкіна, Ясеніна, Маякоўскага. Да Маякоўскага я добра стаўлюся, вельмі цаню гэтага паэта», — распавёў Лукашэнка.
Лукашэнка назваў свайго сына «чарнамазым»
«У нас ніхто не пытае пашпарт, калі ён „твар каўкаскай нацыянальнасьці“. У нас усе людзі аднолькавыя. Але быў такі эпізод, у мяне сын „чарнамазы“, ідзе паўз Дом ураду (гадоў пяць таму), да яго падыходзіць міліцыянт, кажа: „Пакажыце свае дакумэнты“. Ён паказаў, а яму: „Ой, прабачце“. Ну, таму што ён на каўказца падобны, напэўна», — распавёў ён, хутчэй за ўсё, маючы на ўвазе старэйшага сына Віктара.
Лукашэнка гатовы сустрэцца з Рамзанам Кадыравым
Адказваючы на пытаньне журналіста з Грознага пра стасункі Беларусі і Чачні, Лукашэнка заявіў, што кіраўнік Чачні Рамзан Кадыраў ужо двойчы зьбіраўся прыехаць у Беларусь, але па тых ці іншых прычынах візыт зрываўся.
«Але я думаю, што ў найбліжэйшы час мы сустрэнемся», — заявіў ён.
«У нас сёньня столькі памылак, што Сталін здрыгануўся б»
Лукашэнка заявіў пра важнасьць беражлівага стаўленьня да гісторыі.
«У нас сёньня столькі памылак, што Сталін бы, калі б убачыў, здрыгануўся. Ня трэба кідаць камяні ў гісторыю», — адзначыў ён.
Лукашэнка таксама ня згодны з тым, што ў свой час адмянілі вывучэньне гісторыі КПСС у ВНУ:
«Якая б партыя ні была... Вазьміце Вялікую Айчынную — камуністы, камсамольцы ішлі ў атаку з партыйным білетам. Гэта ж было. Вось я быў камуністам. Я ня думаў, што будуць агульныя жонкі, што ня будзем працаваць, а толькі спажываць. Я працаваў з раніцы да ночы».
Лукашэнка заявіў, што гатовы закрыць мяжу паміж Расеяй і Данбасам
Лукашэнка фактычна намякнуў на магчымасьці міратворчай місіі Беларусі ў зоне канфлікту на Данбасе.
«Калі вы хочаце гэтыя 400 кілямэтраў межаў паміж Данбасам і Расеяй, паміж Украінай і Расеяй на гэтым этапе закрыць і навесьці парадак — калі ласка, мы гэта зробім. Калі вы гэтага хочаце. Самі мы туды не палезем — чаго мы палезем у чужую хату, калі мы там нежаданыя госьці? Але лічыць нас людзьмі староньнімі нельга».
Лукашэнка таксама згадаў, што беларусы-ўдзельнікі канфлікту на Данбасе вяртаюцца ў Беларусь, дзе іх «кантралююць».
«Хтосьці ваюе на баку Ўкраіны, хтосьці на баку апалчэнцаў. А куды яны вяртаюцца? Яны вяртаюцца ў Беларусь. Так, мы іх кантралюем. Але гэта каштуе грошай. Нам гэта трэба? Нам гэта ня трэба», — заявіў ён.
«Пераможцаў у гэтай бойні ня будзе. Гляджу часам расейскае тэлебачаньне — ну такі патрыятызм, такія патрыёты. А сам думаю, а вашы дзеці там ваююць? Тыя, хто крычаць перад тэлекамэрамі?» — кажа Лукашэнка.
«Сёньня Данбас не патрэбны Расеі. Ён зьнішчаны цалкам», — падкрэсьліў ён.
Лукашэнка распавёў пра жаданьне набыць кампанію «Башнефть»
Журналіст зь Цюменскай вобласьці пацікавіўся ў Лукашэнкі, чаму б Беларусі ня ўзяць у распрацоўку адно з нафтавых радовішчаў у Расеі.
«Вашы б словы ды Богу ў вушы. Што перашкаджае? Пазыцыя расейскага кіраўніцтва. А як потым уплываць на Беларусь, калі яна будзе нафту здабываць, а потым і газ?.. Калі б у нас сёньня было 7-8 мільёнаў тон нафты, у нас бы не было ніякіх праблемаў. Гэта была б самая квітнеючая эўрапейская краіна».
Лукашэнка заявіў, што хацеў бы набыць акцыі расейскай кампаніі «Башнефть» — адпаведную прапанову ён накіроўваў расейскаму кіраўніцтву.
«Часта нас крытыкуюць — вось, Лукашэнка ня хоча прыватызаваць 4 прадпрыемствы. Расея хацела б буйныя прадпрыемствы. Напрыклад, прадпрыемствы, якія выпускаюць трэйлеры для перавозкі ракет „Тополь“ (маецца на ўвазе МЗКЦ — РС). „Інтэграл“ расейцы хочуць прыватызаваць — такіх ужо няма на постсавецкай прасторы. Я кажу — добра. У вас ёсьць цікавасьць да гэтых прадпрыемстваў. А ў мяне ёсьць цікавасьць да здабычы нафты, каб 7-8 мільёнаў тон мы маглі здабываць самі. І вось калі была прыватызацыя „Башнефти“, я накіраваў прапанову вашаму кіраўніцтву. Беларусы зразумеюць, калі мы гэтыя прадпрыемствы абмяняем на акцыі „Башнефть“, якія вы перадалі „Роснефти“. Да гэтага часу адказу няма. Значыць, ня хочуць».
«У нас палова ўраду рускія»
Лукашэнка адказаў на абвінавачваньні ва ўціску расейскай мовы ў Беларусі і правядзеньне палітыкі беларусізацыі.
«Некаторыя арыентаваныя нібыта на Расею людзі, тыя ж блогеры, кажуць — вось, мяккая беларусізацыя ідзе... Як быццам у Беларусі анямечваньне павінна быць! Ды ў нас палова ўраду рускія, а можа і больш. Я іх ніколі не лічу», — заявіў ён.
Ад рускай мовы беларусы адмаўляцца не зьбіраюцца:
«Калі нашы некаторыя нацыяналісты кажуць — вось расейскую мову... Я пытаюся: чаму мы ад гэтай спадчыны павінны адмаўляцца? Калі мы хочам у сувязі з гэтым спарадзіць і эканамічныя праблемы, то мы можам адмовіцца ад расейскай мовы».
Пра любімую лічбу
Лукашэнка ня верыць, што лічба 13 нешчасьлівая.
«13 — гэта мая любімая лічба. Калі займаюся спортам, я 13 кілямэтраў бягу. Калі раблю нейкае практыкаваньне, дык 13 разоў раблю ці некалькі разоў па 13», — распавёў ён.
Пра «штрафбаты» для чыноўнікаў
Лукашэнка распавёў расейскім журналістам пра практыку памілаваньня карумпаваных чыноўнікаў, каб тыя пасьля працавалі кіраўнікамі калгасаў.
«Амніставаў групу чыноўнікаў-бізнэсмэнаў — накіраваў у калгасы-саўгасы. Паглядзім, як яны ня справяцца».
Лукашэнка ў сувязі з гэтым згадаў лёс памілаванага намесьніка генпракурора Аляксандра Архіпава.
«З маёй радзімы пракурор. Намесьнік генэральнага пракурора — накасячыў. Пайшоў старшынём калгасу. Хочаш — ідзі. Або ў турме сядзі».