Лінкі ўнівэрсальнага доступу

Бізнэс — уладам: Вы траціце больш, чым мы можам вам даць


Асамблея дзелавых колаў
Асамблея дзелавых колаў

Беларускі бізнэс просіць улады аслабіць ціск і не перашкаджаць прадпрымальнікам працаваць, але ўжо слаба верыць, што ўрад іх пачуе.

Пра гэта ішла размова падчас XVI Асамблеі дзелавых колаў, якая адбылася ў Менску 4 сакавіка.

Андрэй Карпунін
Андрэй Карпунін

«Сутнасьць гэтага году ня ў тым, што мы кепска працуем ці мы атрымалі нейкія зьнешнія праблемы. Сутнасьць праблемы гэтага году ў тым, што дзяржава зьвярстала бюджэт, а мы з вамі не дацягваем да гэтага бюджэту па ўнясеньні ў яго даходаў. Таму нашы ўзаемаадносіны з уладамі павінны заключацца не ў пытаньні, колькі мы яшчэ павінны дзяржаве. Пытаньне павінна стаяць па-іншаму: дзяржава, можа, ты крыху больш траціш, чым мы можам табе даць?» — заявіў на Асамблеі старшыня Рады дырэктараў ІПА «Рэгістар», старшыня Клюбу фінансавых дырэктараў Андрэй Карпунін.

Асамблея дзелавых колаў
Асамблея дзелавых колаў

«Мы згодныя, што ўладам трэба дапамагчы ў гэты час, таму што трэба плаціць заробкі настаўнікам і лекарам. Але давайце будзем сумленнымі: у гэты ж самы момант на куплю аўтатранспартных сродкаў (не спэцыяльнага прызначэньня, а звычайных сваіх легкавых аўтамабіляў) розныя органы ўлады ў краіне, паводле ацэнак экспэртаў аўтаіндустрыі, выдаткавалі амаль паўмільярда даляраў. Гэта значыць, атрымліваецца перакос: мы разумеем, што трэба фінансаваць зарплаты лекараў і настаўнікаў, а зь іншага боку, яны гэтыя грошы трацяць на набыцьцё новых Land Rover. А калі мы ўсе сёньня заціснутыя ў адной лодцы з адным вяслом, то давайце разам гэтым вяслом і карыстацца», — заявіў ён.

XVI Асамблея дзелавых колаў была адзначаная дастаткова салідным прадстаўніцтвам улады. У Асамблеі прынялі ўдзел тры намесьнікі міністраў (ад Міністэрства эканомікі, Міністэрства гандлю і Міністэрства па падатках і зборах), а таксама некалькі дэпутатаў Палаты прадстаўнікоў.

Аднак, нягледзячы на дэкляратыўныя заявы аб неабходнасьці дыялёгу і супрацоўніцтва паміж бізнэсам і ўладай, веры ў такі дыялёг практычна няма, што і было засьведчана на Асамблеі.

Згодна з агучанымі на Асамблеі дадзенымі сацыялягічнага дасьледаваньня, толькі 5,6% беларускіх бізнэсмэнаў вераць уладам, а 80% не давяраюць, прычым узровень недаверу за апошнія месяцы істотна вырас. На такую дынаміку паўплываў цэлы шэраг непрадуманых і памылковых, з пункту гледжаньня прадпрымальнікаў, рашэньняў уладаў, якія прымаліся ў апошні час.

«Урад сёньня ня ў стане дапамагчы прыватнаму бізнэсу, ён у стане хаця б не перашкаджаць, ня ставіць яго ў загадзя нявыгадныя канкурэнтныя ўмовы»
Урад сёньня ня ў стане дапамагчы прыватнаму бізнэсу, ён у стане хаця б не перашкаджаць
«Урад сёньня ня ў стане дапамагчы прыватнаму бізнэсу, ён у стане хаця б не перашкаджаць, ня ставіць яго ў загадзя нявыгадныя канкурэнтныя ўмовы»

«Урад сёньня ня ў стане дапамагчы прыватнаму бізнэсу, ён у стане хаця б не перашкаджаць, ня ставіць яго ў загадзя нявыгадныя канкурэнтныя ўмовы», — заявіў старшыня РГА «Беларуская навукова-прамысловая асацыяцыя» Аляксандр Швец.

Ён заклікаў улады да рашучых захадаў, каб не даводзіць сытуацыю да эканамічнай катастрофы:

«У пачатку 20-х бальшавікі абвясьцілі новую эканамічную палітыку, таму што ў грамадзтве наступіў рэальны каляпс. Я б хацеў прасіць урад: ну, давайце разам распрацуем і рэалізуем новую эканамічную палітыку, давайце не даводзіць да яшчэ большых эканамічных складанасьцяў», — адзначыў Швец.

Уладзімір Карагін, старшыня Менскага сталічнага зьвязу прадпрымальнікаў і працадаўцаў
Уладзімір Карагін, старшыня Менскага сталічнага зьвязу прадпрымальнікаў і працадаўцаў

Аднак разуменьня ва ўладаў прадпрымальнікі сёньня не сустракаюць. Старшыня прэзыдыюма «Рэспубліканскай канфэдэрацыі прадпрымальніцтва» Ўладзімер Карагін абвінаваціў некаторыя міністэрствы ў «сабатажы» дыялёгу паміж бізнэсам і ўладай:

«Прадстаўляючы ў парлямэнце новага прэм’ер-міністра Андрэя Кабякова, прэзыдэнт сказаў прама і адназначна: каб урад не сядзеў у кабінэтах і пайшоў сустракацца з прадпрымальнікамі. Мы паглядзім, як некаторыя міністэрствы выконваюць гэты наказ. У нас ёсьць нашы традыцыйныя саюзьнікі — гэта міністэрствы эканамічнага блёку. Але цэлы шэраг міністэрстваў па-ранейшаму сабатуе дыялёг бізнэсу і ўлады — і ў грамадзка-кансультатыўных радах пры міністэрствах, і падчас сустрэчаў, і з пункту гледжаньня меркаваньняў прадпрымальнікаў у прынцыпе».

Уладзімір Карагін і Аляксандр Калінін, старшыня Беларускага зьвязу прадпрымальнікаў.
Уладзімір Карагін і Аляксандр Калінін, старшыня Беларускага зьвязу прадпрымальнікаў.

Зрэшты, улада таксама агучыла прэтэнзіі да бізнэсоўцаў. Намесьнік міністра гандлю Ірына Наркевіч панаракала на тое, што прадстаўнікі бізнэсу толькі і робяць, што патрабуюць, а самі, як правіла, не законапаслухмяныя і нядобрасумленныя. У якасьці прыкладу намесьнік міністра прывяла апошнія рэйды Мінгандлю па кірмашах, падчас якіх была выяўлена процьма грубых парушэньняў.

Ірына Касьцевіч, намесьнік міністра эканомікі Беларусі
Ірына Касьцевіч, намесьнік міністра эканомікі Беларусі

«Які дыялёг можа быць паміж бізнэсам і ўладай, калі арганізатары кірмашу, як суполка грамадзтва, павінны нешта рабіць, але зусім ня хочуць рабіць. Але ён пры гэтым патрабуе! Вось вам і дыялёг», — заявіла Ірына Наркевіч.

Прадпрымальнікі падчас Асамблеі ўзьнялі праблему непразрыстасьці даходаў і выдаткаў дзяржструктураў, а таксама дзяржаўнага пратэкцыянізму, «якім усё вакол прасякнута».

Старшыня Клюбу фінансавых дырэктараў Андрэй Карпунін, у прыватнасьці, заклікаў раскрыць інфармацыю пра даходы і выдаткі «Белдзяржстраха», які праз абавязковае страхаваньне «зьядае» ў сярэднім 0,7% фонду аплаты працы ўсёй Рэспублікі Беларусь.

Ён таксама заклікаў Міністэрства па падатках і зборах вярнуць прадпрымальнікам «права плаціць падаткі бясплатна» — гэта значыць, бяз розных пабораў, якія фактычна прымусова ўводзяць чыноўнікі.

«Хацелася б папрасіць Міністэрства па падатках і зборах усё ж такі раскрыць дадзеныя па даходах і выдатках РУП „Інфармацыйна-выдавецкі цэнтар па падатках і зборах“. Ці дастаткова яны атрымліваюць грошай за электронныя лічбавыя ключы, ці пакрывае гэта іх выдаткі на інфарматызацыю падатковага адміністраваньня? Можа, у нас ёсьць рэзэрвы і ў гэтым аспэкце?» — пацікавіўся Карпунін.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG