«Затрымана трое падазраваных», — паведаміў сёньня на брыфінгу ў Адэсе кіраўнік пракуратуры Адэскай вобласьці Алег Жучэнка.
Паводле яго, выкраданьне Аляксея Ганчарэнкі было арганізавана злачыннай групай з мэтаю помсты за падзеі 2 траўня 2014 года ў Адэсе, калі пад час пажару ў Будынку прафсаюзаў загінулі прарасейскія актывісты.
Алег Жучэнка адзначыў, што затрыманая група вырабляла і распаўсюджвала друкаваныя матэрыялы, якія мелі характар справакаваць нацыянальную ды міжэтнічную варожасьць. Пад час «дакумэнтацыі» гэтай групы праваахоўнікі і ўстанавілі факт замаху на жыцьцё і здароўе дэпутата, у прыватнасьці, плянавалі напад з выкарыстаньнем кіслаты.
Да свайго абраньня ў Вярхоўную Раду Ўкраіны Аляксей Ганчарэнка быў прыхільнікам Партыі рэгіёнаў, але пасьля ўцёкаў у Расею Віктара Януковіча і іншых прадстаўнікоў тагачаснай улады выступаў на іх адрас з рэзкай крытыкай.
На парлямэнцкіх выбарах у 2014 годзе Аляксей Ганчарэнка балятаваўся ўжо ад Блёку Пятра Парашэнкі па мажарытарнай акрузе ў Адэсе. Абураны выказваньнямі амбасадара Нямеччыны адносна магчымасьці правядзеньня выбараў на Данбасе, арганізаваў флэш-моб, намаляваўшы фарбай на кавалку Бэрлінскай сьцяны ў Кіеве слова «не» на нямецкай мове.