Лінкі ўнівэрсальнага доступу

«На МТЗ некаторыя цэхі працуюць па тры дні на тыдзень»


Галоўная прахадная МТЗ

Галоўная прахадная МТЗ

«Як вы лічыце, ці ў правільным кірунку разьвіваецца беларуская эканоміка? Якія зьмены адбываюцца апошнім часам на вашым заводзе?» Гэтыя і іншыя пытаньні работнікам Менскага трактарнага заводу каля прахадной прадпрыемства задавала Галіна Абакунчык.

Карэспандэнтка: «Як працуецца на заводзе цяпер, якія зьмены адбываюцца?»

Працоўны маладых гадоў: «Цяжка цяпер, напружана: збыту няма і працы няма. Некаторыя цэхі працуюць па тры дні на тыдзень».

Карэспандэнтка: «Якія заробкі ў людзей у гэтай сувязі, як яны выжываюць?»

Працоўны маладых гадоў: «Заробак меншы, вядома, але неяк выжываюць».

Карэспандэнтка: «Што кажа кіраўніцтва?»

Працоўны маладых гадоў: «Нічога ня кажа — сядзяць ды на неба глядзяць».

Карэспандэнтка: «Як вы лічыце, ці ў правільным кірунку разьвіваецца беларуская эканоміка ў такой сытуацыі?

Працоўны маладых гадоў: «Гэтага я не магу сказаць — ня мне меркаваць».

Карэспандэнтка: «Якое цяпер становішча ў эканоміцы, на прадпрыемстве, ці ў правільным кірунку яно разьвіваецца?»

Працоўны сярэдніх гадоў: «Што не паляпшаецца, то гэта дакладна. А што будзе далей, ня ведаю. Але яна павінна рухацца, разьвівацца ўвесь час, каб працоўныя месцы былі, каб людзі прыходзілі і працавалі, а не адпачывалі і праседжвалі час. А так, як ёсьць — так не павінна быць. Паглядзіце, вунь колькі трактароў стаіць — не прадаецца ж нічога».

Карэспандэнтка: «Ці задаволеныя працай на вашым заводзе? Якія зьмены адбываюцца?»

Іншы працоўны сярэдніх гадоў: «Каму падабаецца, а каму і не — моладзі ж не загадаеш».

Карэспандэнтка: «А вам?»

Іншы працоўны сярэдніх гадоў: «Мне падабаецца, заробак задавальняе, хоць хацелася б і большага. Але ж крызіс усё ж такі».

Карэспандэнтка: «А ў чым у вас на заводзе выяўляецца гэты крызіс?»

Іншы працоўны сярэдніх гадоў: «У чым, у чым — каб трактары лепш набывалі. А то вунь стаіць усё валам».

Карэспандэнтка: «Тады як вы лічыце, ці ў правільным кірунку разьвіваецца беларуская эканоміка?»

Іншы працоўны сярэдніх гадоў: «Гэта кіраўніцтву лепш бачна. І добра, каб яны лепш працавалі, тады і трактары будуць лепш прадавацца, і заробак, пэўна, большы стане».

Карэспандэнтка: «Як працуецца на заводзе, якія зьмены ў вас адбываюцца?»

Працоўны старэйшых гадоў: «Усё цудоўна».

Карэспандэнтка: «І затаваранасьці складоў няма?»

Працоўны старэйшых гадоў: «Што ёсьць, тое ёсьць. Бо крызіс у Расеі, бо кошт нафты ўпаў — грошай няма ані ў кога».

Карэспандэнтка: «А ў нашай эканоміцы ці ўсё добра, калі праўдзе ў вочы глядзець?»

Працоўны старэйшых гадоў: «Ды поўная..... Ня буду я заканчваць...»

XS
SM
MD
LG