Лінкі ўнівэрсальнага доступу

Бацька пабітага раварыстам хлопца: «Гэтага чалавека зь бітай часта бачылі ў Менску»


Васіль Дземідовіч пасьля ўдару бітай ад раварыста
Васіль Дземідовіч пасьля ўдару бітай ад раварыста

Аляксандар Дземідовіч, чыйго сына Васіля нядаўна жорстка пабіў невядомы раварыст, расказаў карэспандэнту, як на здарэньне рэагуюць людзі.

«Другі дзень шмат тэлефануюць і пішуць. Людзі спагадаюць. Многія кажуць, што часта бачылі гэтага чалавека на ровары зь бітай. Раз ён насварыўся на дзяцей у адным месцы, іншы раз пагражаў людзям бітай. Я спадзяюся, што канец канцом яго ўсё ж знойдуць, бо міліцыя гэтым пільна займаецца. У сына ўзялі паказаньні і запэўнілі, што давядуць справу да суду», — расказаў Аляксандар Дземідовіч.

Як пачуваецца Васіль Дземідовіч, у якога лекары выявілі пашкоджаньне чэрапу?

«Кажа, што лепш. Ужо выходзіць з палаты, мацнее. Хаця пра выпіску гаворкі няма. Кажуць, што выпішуць дзён праз 10 — не раней. Васіль трывожыцца таксама, ці па выздараўленьні яму дазволяць вадзіць аўтамабіль. Ён хацеў запісацца на курсы, але цяпер давядзецца, відаць, пачакаць», — кажа бацька пацярпелага хлопца.

Інцыдэнт адбыўся 19 чэрвеня на вуліцы Прытыцкага. Празь няўважлівасьць 17-гадовы Васіль Дземідовіч выйшаў на роварную дарожку, па якой ехаў невядомы раварыст. Той урэзаўся ў хлопца і ўпаў з ровара. Падняўшыся, ён выцягнуў з заплечніка біту і ўдарыў Васіля па галаве. Лекары дыягназавалі чэрапна-мазгавую траўму.

Праверку інцыдэнту праводзяць у Фрунзенскім РУУС Менску. Міліцыя кажа, што раварыста могуць абвінаваціць у хуліганскім нападзе з нанясеньнем траўмы. Другое абвінавачваньне могуць вынесьці за тое, што беспрытомнага Васіля Дземідовіча гэты чалавек пакінуў ляжаць на зямлі — за пакіданьне пацярпелага ў бездапаможным стане. На шчасьце, людзі выклікалі хуткую дапамогу і пасьпелі сфатаграфаваць невядомага раварыста на мабільны тэлефон.

Інцыдэнт выклікаў вялікі розгалас ў інтэрнэце.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG