Гурт Сяргея Міхалка Brutto прадставіў відэакліп на песьню «Середні віки» на словы вядомага ўкраінскага пісьменьніка Сяргея Жадана. Відэа зьнятае рэжысэркай Ганнай Бурачковай. Удзельнікі гурту едуць на скейтбордах, за іхнымі сьпінамі — шэрыя крылы.
Гэта ўжо другі кліп Brutto на ўкраінскую песьню: пад Новы год гурт прадставіў «Вечірнє сонце» на верш украінскай паэткі Ліны Кастэнкі.
Brutto базуецца ва Ўкраіне, дзе і выступае найбольш актыўна (паралельна Міхалок мае праект «Ляпіс-98»). Сяргей Міхалок зьехаў зь Беларусі празь ціск КДБ — яму ў 2011 годзе пагражала крымінальная справа за абразу Аляксандра Лукашэнкі.
За тры дні да прэзэнтацыі песьні «Середні віки» Brutto ўпершыню выступіў у Беларусі (для Міхалка гэта быў першы з 2010 году выступ на радзіме). Свабода вяла жывую відэатрансьляцыю канцэрту.
