Лінкі ўнівэрсальнага доступу

Гомель: выстава загінулага францускага журналіста


Фотапартрэт Мішэля Рэно на гомльскай выставе

Фотапартрэт Мішэля Рэно на гомльскай выставе

Сотні тысяч людзей прайшлі 11 студзеня па Парыжы маршам адзінства супраць тэрарызму. Гэткім чынам парыжане й лідэры шэрагу эўрапейскіх краінаў, якія ўзялі ўдзел у маршы, ушанавалі і памяць ахвяраў тэрактаў, у тым ліку й расстраляных супрацоўнікаў сатырычнага часопіса Charlie Hebdo.

Тым часам у Гомелі на знак салідарнасьці з парыжанамі ў галерэі Гаўрылы Вашчанкі адкрылася выстава францускага журналіста, фатографа і падарожніка Мішэля Рэно — аднаго з тых, хто загінуў пры нападзе ісламістаў на рэдакцыю часопіса Charlie Hebdo.

Захавальнік фондаў галерэі Алег Курашоў кажа:

«У дадзеным выпадку нас наўпрост закрануў тэрарыстычны акт. У прыватнасьці, тым, што адзін з загінулых, Мішэль Рэно, — гэта фатограф, які пяць гадоў таму рабіў у галерэі сваю пэрсанальную выставу. І падарыў гораду, галерэі дзесяць сваіх фатапрац. Гэта добры чалавек і майстра, які не заслугоўваў такой недарэчнай гвалтоўнай сьмерці».

Суразмоўца ўдакладніў, што гэта за здымкі:

«Мішэль Рэно падарыў нам дзесяць фатаздымкаў, зробленых у розных кутках Зямлі. У прыватнасьці, у Этыёпіі, Маўрытаніі, Францыі, Віетнаме, Буркіна-Фасо, Інданэзіі. Гэта вельмі шырокая геаграфія. Ён езьдзіў у якасьці карэспандэнта розных выданьняў па ўсім сьвеце. І фатаграфаваў, прычым фатаграфаваў вельмі якасна. Шэраг ягоных прац атрымалі высокія прызы й пахвалу майстроў фатаграфіі».

Здымкі Мішэль Рэно падарыў гомельскай галерэі ў 2009 годзе — пасьля сваёй выставы ў Гомелі, якая назывался «Падарожжа вакол сьвету ў 80 фатаздымках».

Супрацоўнікі галерэі дадалі да Мішэлевых свае здымкі, зробленыя тут падчас выставы пяць гадоў таму — і выйшла цэлая экспазыцыя.

Сёньня выставу аднымі зь першых наведалі навучэнцы сярэдняй школы № 46, якая носіць імя Паскаля і месьціцца на вуліцы Клермон-Фэран.

Фотаздымкі Мішэля Рэно

Фотаздымкі Мішэля Рэно

Мішэль Рэно быў цесна зьвязаны з Гомельшчынай. Ён ажаніўся зь беларускай, ураджэнкай вёскі Данілевічы Лельчыцкага раёну, настаўніцай францускай мовы Галінай Раманавай. У іх расьце дачка Васіліса, названая ў гонар лельчыцкага дзеда — Васіля Раманава.

А пазнаёміліся Галіна і Мішэль у Гомелі, калі Мішэль прыяжджаў у складзе дэлегацыі францускага горада-пабраціма — Клермон-Фэрана.

Васіль і Марыя Раманавы даведаліся пра трагедыю ў Парыжы праз тэлефон ад дачкі. Мішэль паехаў у Францыю па рэдакцыйных справах, бо ў Клермон-Фэране ён выдаваў і свой часопіс.

Васіль Рыгоравіч кажа, што аплаквалі зяця дома. У Францыю паляцела іх старэйшая дачка Ніна.

79-гадовы паляшук Васіль Раманаў згадвае, што зяць дужа любіў падарожжы, зь якіх вяртаўся з мноствам фатаздымкаў. Калі Раманавы наведвалі Клермон-Фэран, то Мішэль Рэно таксама не прамінуў зафіксаваць на фота моманты гэтай гасьціны:

«Ён рабіў у мэрыі. І мы там былі. І фатаграфіі ў нас з мэрыі ёсьць. Ён быў намесьнікам мэра і рэдактарам свайго часопіса ў Клермон-Фэране. І часопіс гэты ёсьць са здымкамі. Там і Галя — як яна гомельскіх школьнікаў сустракае. Усё ў нас на фатаздымках ёсьць».

Гомельская галерэя Гаўрылы Вашчанкі

Гомельская галерэя Гаўрылы Вашчанкі

XS
SM
MD
LG