Пра аварыю з удзелам Марыны Адамовіч напісаў у Фэйсбуку яе сын Юрась Адамовіч.
«Лабавое. Машына ўсьмятку. Падушкі бясьпекі спрацавалі. Маці ў прытомнасьцi, дакладны стан невядомы», — напісаў Юрась гадзіну таму.
Спачатку тэлефон Марыны Адамовіч не адказваў. Некалькі хвілін таму Марына адгукнулася. «Прабачце, цяпер не магу гаварыць. Так, я ў шпіталі. Падрабязнасьці пазьней».
Як паведаміла Марына Адамовіч, яна цяпер знаходзіцца ў шпіталі райцэнтру Круглае Магілёўскай вобласьці: «Адчуваю сябе зараз лепш».
Марына Адамовіч трапіла ў аварыю, калі ехала разам з адвакатам з Шклова, дзе наведвала шклоўскую калёнію, у якой утрымліваюць Мікалая Статкевіча.
«Спадзяюся, з адвакатам усё добра. Ён застаўся пры машыне», — сказала Марына Адамовіч.
Паволе Марыны Адамовіч, па яё ў шпіталь выправіўся сын.
Як паведаміў пазьней Радыё Свабода Юрась Адамовіч, паводле яго зьвестак, людзі ў іншай машыне, гэтаксама як і адвакат, не атрымалі значных пашкоджаньняў, нягледзячы на моц сутыкненьня.
