Лінкі ўнівэрсальнага доступу

Марылюіза Бэк запатрабавала вызваліць Ігара Аліневіча


Марылюіза Бэк

Марылюіза Бэк

Дэпутатка нямецкага Бундэстагу Марылюіза Бэк запатрабавала неадкладнага вызваленьня палітвязьня Ігара Аліневіча, які адбывае пакараньне ў калёніі «Віцьба-3».

Сьпікер па пытаньнях усходнеэўрапейскай палітыкі парлямэнцкай групы Партыі зялёных у нямецкім Бундэстагу Марылюіза Бэк зрабіла заяву да чацьвёртай гадавіны прысуду палітвязьню. Ігар Аліневіч асуджаны на 8 гадоў пазбаўленьня волі 27 траўня 2011 году.

Паводле Марылюізы Бэк, Ігар Аліневіч мае права на справядлівы судовы разбор.

«Мы вельмі занепакоеныя тым, што палітычных зьняволеных у Беларусі караюць дадатковымі рэпрэсіямі ў турме. Вязьні неаднаразова зазнавалі адзіночнае зьняволеньне, недастатковае мэдычнае абслугоўваньне і непрымальныя ўмовы турэмнага зьняволеньня. Відавочна, ёсьць намер прымусіць гэтых палітзьняволеных напісаць прашэньне аб памілаваньні і ў той жа час прызнаць сваю віну», — адзначае нямецкая дэпутатка Марылюіза Бэк.

Паводле Бэк, судовы працэс супраць Ігара Аліневіча характарызаваўся сур’ёзнымі парушэньнямі канстытуцыйных прынцыпаў.

«Ён быў выкрадзены на выгнаньні ў Маскве невядомымі асобамі і дастаўлены ў КДБ Беларусі. Падчас допыту ён стаў ахвярай псыхічных і фізычных зьдзекаў. Празьмерна жорсткае пакараньне — 8 гадоў у турме —гэта палітычна матываваны прысуд», — адзначае дэпутатка.

«Я не падзяляю ідэяў „анархістаў“ у Беларусі. Тым ня менш паводле Канстытуцыі яны маюць права на суд. Улічваючы, што такія суды, як правіла, адсутнічаюць у Рэспубліцы Беларусь, я прыняла статус „хроснай маці“ Ігара Аліневіча ў межах кампаніі „хросных бацькоў“, якую распачала Libereco дзеля палітзьняволеных у Беларусі», — заявіла Бэк.

Ігара Аліневіча абвінавацілі ў злосным хуліганстве і пашкоджаньні маёмасьці агульнанебясьпечным спосабам і ў асабліва буйным памеры.

Кампанія «хросных бацькоў» палітзьняволеных у Беларусі ініцыяваная швайцарска-нямецкай асацыяцыяй Libereco — Партнэрства за правы чалавека. Яна мае на мэце падтрымаць зьняволеных і іхніх сваякоў.

Беларускія і міжнародныя праваабарончыя арганізацыі лічаць Ігара Аліневіча вязьнем сумленьня і заклікаюць неадкладна і безумоўна вызваліць яго.

XS
SM
MD
LG