На сьценах дамоў у розных гарадах Эўропы можна пабачыць некалькі дзясяткаў малюнкаў у пазнавальным стылі: яскравыя «кіслотныя» фарбы, страшнаватыя, але па-свойму прывабныя вобразы людзей ці антрапаморфных жывёлаў, часам налёт містыкі ці кібэрпанку. Іх малюе беларус, вядомы як Key Detail, у звычайным жыцьці — архітэктар Андрэй. Апошнімі гадамі ён усё больш увагі надае творчасьці на вуліцах, і, як распавядае Свабодзе, плянуе прысьвяціць гэтаму сваю будучыню.
Яго малюнкі могуць быць невялікімі, стрыт-арт звыклых маштабаў, а могуць займаць цэлыя сьцены шматпавярховых дамоў. Маўляў, гэта «залежнасьць», бяз гэтага ня можа. Малюнкі на самай справе ёсьць па ўсёй Эўропе: Бэльгія, Грэцыя, Італія, Польшча, Францыя...
«Больш за ўсё ў Нямеччыне, дзе маю нямала сяброў і знаёмых, — распавядае Key Detail. — У гэтай краіне вялікая частка грамадзтва праяўляе цікавасьць да мастацтва, што робіць магчымым ладзіць велізарную колькасьць фэстываляў, выставаў і рознага кшталту мерапрыемстваў, ад невялікіх лякальных да буйных урбаністычных праектаў. У большасьці выпадкаў гэтыя мерапрыемствы падтрымліваюцца мясцовымі ўладамі. У апошні час мая творчасьць у Беларусі менш плённая, чым у Эўропе. Але мае працы можна знайсці і ў Менску, ды большасьць зь іх, на жаль, ужо не існуе. Маляваў вялікую сцяну ў горадзе Рагачоў, спадзяюся, гэтая праца ўсё яшчэ жывая».
Key Detail кажа, што ў свае працы заўсёды ўкладае сэнс, намагаецца не зацыклівацца на адной тэме, а раскрываць розныя пытаньні, што яго цікавяць. Размаляваць цэлую сьцяну ён можа досыць хутка і лёгка, бо мае багата досьведу і практыкі. Ды заўсёды трэба прасіць дазвол:
«У Беларусі абавязковае ўзгадненьне эскізу з абыякавымі чыноўнікамі. У Нямеччыне, напрыклад, гэта нашмат прасьцей, бо практычна ўсе будынкі ў прыватнай уласнасьці. Таму дастаткова абраць цікавую табе сьцяну і дамовіцца наўпрост з домаўладальнікам, якому, як правіла, гэта будзе цікава, без усялякіх папярэдніх узгадненьняў эскізу. Але і ў тым, і ў іншым выпадку сярод людзей трапляюцца выключэньні».
Некаторыя вулічныя мастакі зарабляюць на жыцьцё выключна творчасьцю, сярод іх ёсьць камэрцыйна пасьпяховыя. Славуты брытанец Banksy нават здолеў адкрыць тэматычны «парк-жудзік» Dismaland, гэткі скажоны «Дыснэйлэнд». Key Detail ня бачыць у гэткай камэрцыялізацыі нічога благога:
«Вулічнае мастацтва ўжо ёсьць модным і легкатраўным камэрцыйным прадуктам для буйных кампаній і тых людзей, якія на гэтым умеюць зарабляць грошы. Да нашай краіны гэта пакуль яшчэ не дайшло. На жаль ці на шчасьце, я на гэтым не зарабляю. Але думаю, гэта нядрэнна, калі людзі плоцяць табе не за тое, што ты можаш зрабіць, а за тое, што ты хочаш зрабіць, то бок купляюць мастацтва, а не рамяство».
Мастак ня лічыць, што варта ставіць манумэнтальны росьпіс «на канвэер», цалкам размалёўваць Менск ці іншыя гарады:
«Ня варта перанасычаць гарадзкую прастору вялікімі цяжкавагавымі вобразамі — атрымаецца хаос. Я ўпэўнены, што гэта будзе колькасьць, а ня якасьць. Дастаткова некалькі такіх сьцен у кожным раёне, для пэўнага калярыту. Гэта тое, што тычыцца роспісу вялікіх фасадаў. А наконт незалежнага і паўсядзённага стрыт-арту, хацелася б бачыць яго паўсюдна і часта, прычым у розных формах».
Паглядзець больш работ Key Detail можна на Behance, а таксама на яго Flickr, Facebook і Instagram.
