Лінкі ўнівэрсальнага доступу

Лукашэнка: праз 70 гадоў у Эўропе зноў запахла гарам


Аляксандар Лукашэнка, архіўнае фота

Аляксандар Лукашэнка, архіўнае фота

Беларусь гатова зрабіць усё неабходнае дзеля міру ва Ўкраіне. Пра гэта заявіў кіраўнік Беларусі Аляксандар Лукашэнка на ўрачыстым сходзе, прысьвечаным 70-годзьдзю Перамогі.

«Беларусь ужо нямала зрабіла для таго, каб на ўкраінскай зямлі запанаваў мір. І мы гатовыя зрабіць для гэтага яшчэ больш — усё, што спатрэбіцца, каб спыніць гэтую вайну. Калі мы, славяне, самі не дамовімся, самі ня вырашым, што нам рабіць, то ніхто іншы нам не дапаможа», — заявіў Лукашэнка.

«Праз 70 гадоў пасьля Другой сусьветнай вайны ў Эўропе зноў запахла гарам. І самае жудаснае, пра што і думаць не маглі пераможцы, а таксама мільёны забітых, закатаваных у фашысцкіх засьценках, спаленых у канцлягерах, — што мы, іх нашчадкі, будзем страляць адзін у аднаго, брат пойдзе на брата і будзе яго зьнішчаць! Але гэта здарылася, здарылася на зямлі, шчодра палітай крывёю пераможцаў. Жудасны „падарунак“ загінулым і жывым! Страшны боль для вэтэранаў!»

Паводле Лукашэнкі, тысячагадовая гісторыя навечна згуртавала тры роднасныя народы: беларусаў, расейцаў і ўкраінцаў. «Трагічныя падзеі ў нашых братоў — гэта наш боль», — падкрэсьліў кіраўнік Беларусі.

Лукашэнка адзначыў, што «мы выявіліся дрэннымі спадкаемцамі тых, хто перамог у той вайне»:

«Мы ня выратавалі, не ўтрымалі тую краіну, якую яны абаранялі, і, больш за тое, мы разьвязалі на гэтай славянскай зямлі недаравальную для нас вайну. І чым раней мы гэта ўсьвядомім і зробім усё неабходнае, каб яе спыніць і пакаяцца, пакуль яшчэ жывыя ня толькі вэтэраны, але і ўдзельнікі вайны, тым лепш будзе для нашага пакаленьня».

Таксама Лукашэнка заявіў, што Беларусь здольная рашуча спыніць любыя спробы ўмяшаньня звонку:

«У Беларусі хопіць палітычнай волі, сіл і сродкаў, каб рашуча спыніць любыя спробы ўмяшаньня ў яе ўнутраныя справы».

Паводле Лукашэнкі, некаторыя краіны і сёньня дазваляюць сабе ўмешвацца ва ўнутраныя справы сувэрэнных дзяржаў, а палітыка ціску і эканамічнага шантажу даўно стала штодзённасьцю.

XS
SM
MD
LG