Паліцыя Лёндану зьвязала напад каля брытанскага парлямэнту 22 сакавіка з ісламісцкім тэрарызмам, заявіў кіраўнік Контртэрарыстычнага падразьдзяленьня Скотлэнд-Ярду Марк Роўлі. Ахвярамі тэракту ў сераду сталі 3 чалавекі, каля 40 — параненыя. Нападнік быў забіты.
Паводле прадстаўніка Скотлэнд-Ярду, паліцыя ўстанавіла асобу нападніка, але яго імя пакуль не называецца.
У ноч з 22 на 23 сакавіка брытанская паліцыя правяла рэйд у адной з кватэр у Бірмінгеме. Апэрацыя доўжылася некалькі гадзін, 7 чалавек затрыманыя. Праваахоўныя органы адмовіліся зьвязаць ператрусы з тэрактам у цэнтры Лёндана, аднак раней СМІ паведамлялі, што аўтамабіль, на якім невядомы зьбіў мінакоў на мосьце, быў арандаваны ў Бірмінгеме.
22 сакавіка на Ўэстмінстэрскім мосьце каля будынку парлямэнту Вялікабрытаніі аўтамабіль зьбіў некалькіх мінакоў. Затым кіроўца напаў з нажом на паліцыянта, які дзяжурыў перад парлямэнтам. Паводле зьвестак паліцыі, загінулі 3 чалавекі, у тым ліку паліцыянт, каля 40 параненыя.
Праваахоўныя органы з самага пачатку не выключылі вэрсію тэракту: напад адбыўся ў гадавіну тэрактаў у Брусэлі — год таму адбыліся выбухі ў аэрапорце і мэтро сталіцы Бэльгіі, тады загінулі 35 чалавек. Напад 22 сакавіка — найбуйнейшы тэракт у Лёндане зь ліпеня 2005 году, калі былі падарваныя тры цягнікі лёнданскага мэтро і адзін аўтобус. Ахвярамі атакі сталі 52 чалавекі.