Лінкі ўнівэрсальнага доступу

Купляць самалёты і галадаць, — Алесін пра набыцьцё Беларусьсю «Су-35С»


«Су-35С»

«Су-35С»

Ці будзе Беларусь набываць у Расеі найноўшы зьнішчальнік «Су-35С»? Паводле намесьніка міністра фінансаў Беларусі Юрыя Селіверстава, які прысутнічаў 15 верасьня ў Палаце прадстаўнікоў Нацыянальнага сходу, грошай на гэтыя самалёты ў бюджэце на 2017 год не прадугледжана.

Аднак закупы іншай авіяцыйнай тэхнікі адбываюцца, паведаміў журналістам Юры Селіверстаў.

«На закуп сродкаў узбраеньня мы прадугледзелі дастаткова, сёлета куплялі вучэбна-баявыя самалёты „Як-130“, у будучым годзе будзем купляць іншыя машыны. Ёсьць магчымасьць выкарыстоўваць іншыя сродкі. Пры атрыманьні дадатковых прыбыткаў бюджэту мы будзем фінансаваць пытаньні нацыянальнай бясьпекі», — сказаў намесьнік міністра фінансаў, якога цытуе tut.by. Пэўных сумаў тратаў на самалёты чыноўнік не паведаміў, перадае крыніца.

Ці патрэбныя Беларусі найноўшыя самалёты «Су-35С» ды іншая расейская авіятэхніка?

Незалежны ваенны экспэрт Аляксандар Алесін кажа, што ў гэтым пытаньні ёсьць некалькі складнікаў, на якія можна даць розныя адказы.

Аляксандар Алесін

Аляксандар Алесін

«Яшчэ калі міністрам абароны быў Юры Жадобін, дый раней, пайшлі размовы пра тое, што трэба замяніць нашы старыя „МіГ-29“ на новыя расейскія самалёты „Су-30“. Яны сэрыйна вырабляюцца, іх ужо шмат паступіла на ўзбраеньне расейскага войска, яны і таньнейшыя, і прасьцейшыя ў абслугоўваньні, хоць тэхнічна не такія дасканалыя, як „Су-35С“. Але на іх зрабілі разьлік. А тое, што цяпер пачаліся размовы пра замену часткі „Мігаў“ на „Су-35С“, — мяркую, гэта ўсё ж больш пытаньне дыскусійнае, чым па сутнасьці. „Су-35С“ — гэта перадапошні крок да зьнішчальнікаў 5-га пакаленьня, аналяг амэрыканскага F-22. Фактычна на гэтым плянэры папярэдняга пакаленьня апрабоўваюцца ўсе новыя электронныя прылады: электронная начынка рухавіка, лякатар, новая сыстэма навядзеньня. Узброены ён таксама па-новаму, таму, безумоўна, звышдарагі. Экспартны варыянт, у залежнасьці ад камплектацыі, каштуе да 85 мільёнаў даляраў. На такі самалёт, паводле адкрытых крыніц, ужо прэтэндуюць Кітай, Індыя і яшчэ некаторыя краіны, у якіх ёсьць лішнія грошы. Расея пакуль вырабіла такіх самалётаў усяго некалькі дзясяткаў, бо вельмі дорага. Таму нам марыць пра такія самалёты, мяркую, не выпадае. З нашым вайсковым бюджэтам у 1 мільярд даляраў — а гэта на ўсё, і на ўтрыманьне войска, на танкі з гарматамі, на жыльлё для вайскоўцаў — дык колькі Беларусь можа купіць такіх самалётаў?»

Нам марыць пра такія самалёты, мяркую, не выпадае

Паводле экспэрта Аляксандра Алесіна, аргумэнтамі пра адсутнасьць у дзяржаўным бюджэце грошай на «Су-35С» прадстаўнікі ўраду вырашылі спыніць размовы пра набыцьцё гэтых самалётаў Беларусьсю. Але, мяркуе экспэрт, фінансавыя аргумэнты ў гэтай тэме не адзіныя.

«Скажу больш — нам і „Су-30“ не па кішэні. Там гаворка ідзе пра кошты 45–50 мільёнаў даляраў. Нават калі нам прададуць са зьніжкай, за 30 мільёнаў — усё роўна такіх грошай у нас няма. Наш вайсковы бюджэт — недзе каля 1 мільярда даляраў у эквіваленце, а цяпер з прычыны інфляцыі і меней. Пытаньне стаіць гэтак: купляць самалёты і галадаць? Або ўсё ж неяк больш рацыянальна дзейнічаць? Выхад бачу ў падаўжэньні закупаў самалёта „Як-130“, які і вучэбны, і баявы, і можа па нізкіх цэлях працаваць. Хаця і „Як-130“ не такі ўжо і танны — да 15 мільёнаў даляраў, але, магчыма, нам крыху таньней прадаюць.

І яшчэ ёсьць меркаваньне супроць закупаў „Су-35С“. А навошта? Гэтыя цяжкія самалёты могуць добра прыдацца краіне зь вялікай тэрыторыяй. Вось Інданэзія купляла „Су-30“ і зьбіраецца купляць „Су-35“, дык там тысяча астравоў, велізарныя адлегласьці. А нам ён навошта з адлегласьцю палёта ў 4500 кілямэтраў і хуткасьцю 2,3 тысячы кілямэтраў за гадзіну? Ён праляціць і не заўважыць, што Беларусь ужо скончылася.

Таму, мяркую, гэтыя размовы пра магчымыя закупы „Су-35С“ — з галіны дыскусіяў пра нерэальныя рэчы. Наша эканамічнае становішча не паляпшаецца, а пагаршаецца, і пакуль будаваць такія пляны не выпадае. Такіх самалётаў нам не купіць. Мы пакуль і „Су-30“ ніводнага не набылі, гэта ў далёкай пэрспэктыве, разьлічанай на 20-я гады, не раней».

Паказаць камэнтары

XS
SM
MD
LG