Бывае, што аднойчы ўсё ж захочацца размаўляць па-беларуску. Добра, калі ёсьць беларускамоўныя сябры, зь якімі можна вучыцца размаўляць на практыцы. Калі такіх няма, варта пачаць з рэсурсаў інтэрнэту, створаных, каб дапамагчы ахвотным вывучаць родную мову, — сьцьвярджае наша аўтарка Аляксандра Сержановіч і прапануе свой ТОП-5 такіх сайтаў.
«Мова Нанова»
Відаць, толькі гультай ня чуў пра бясплатныя курсы па вывучэньні беларускай мовы «Мова Нанова». Калі пачыналася ўсё зь невялічкіх курсаў у Менску, то цяпер «Мова Нанова» — гэта больш за 30 выкладчыкаў, якія праводзяць заняткі ў дзесяці гарадах краіны. Атрымаць інфармацыю пра курсы і заняткі можна на сайце http://www.movananova.by/. Але нас сёньня цікавіць, што на старонках гэтага рэсурсу могуць знайсьці тыя, хто вырашыў вучыць мову сам, пры дапамозе інтэрнэту.
Тым, хто вучыць беларускую мову з нуля, будуць карысныя тэматычныя слоўнікі, якія каманда «Мова Нанова» складае да кожнага свайго занятку. На сайце ёсьць словы, якія спатрэбяцца ў кавярні ці цырульні, у падарожжы, падчас шопінгу, а таксама прызначаныя для людзей бізнэсу, журналістаў, дзяцей і іншых групаў. Слоўнікаў так шмат, што вы без праблемаў знойдзеце патрэбны, а, засвоіўшы ўсе, зможаце размаўляць на любую тэму. Акрамя слоўнікаў, па тэмах ёсьць відэаролікі, якія дапамогуць навучаньню. На сайце можна знайсьці і прыказкі, прымаўкі, каб зрабіць сваю мову больш разнастайнай і прыгожай.
Слоўнік
Наўрад ці можна ўявіць вывучэньне якой-небудзь мовы без карыстаньня слоўнікам. Для тых, хто ўзяўся за беларускую, лепшы варыянт — slounik.org. Тут сабраныя агульныя, тлумачальныя, гістарычныя, дыялектныя слоўнікі, па якіх можна зьдзейсьніць зручны і хуткі пошук патрэбнай інфармацыі. Сайт дае магчымасьць таксама скарыстацца перакладнымі слоўнікамі: зь беларускай на расейскую і, наадварот, з польскай на беларускую. Знаўцам асабліва спадабаюцца лацінска-беларускі і ідыш-беларускі слоўнікі з прыказкамі і прымаўкамі. На гэтым жа сайце можна спампаваць шматлікія слоўнікі, энцыкляпэдыі і навуковыя артыкулы.
Беларуская палічка
Усім вядома: каб зрабіць сваё маўленьне больш багатым і разнастайным, трэба больш чытаць. Прычым зусім не абавязкова чытаць падручнікі. Выбірайце тэму, якая вас цікавіць, і сумяшчайце цікавае з карысным. На дапамогу прыйдзе «Беларуская палічка», на якой сабраная беларуская проза і паэзія, дзіцячая літаратура, а таксама кнігі па мэдыцыне, кулінарыі, мастацтве, архітэктуры, гісторыі, філязофіі ды іншых тэмах. Тут жа можна знайсьці спасылкі на навінныя сайты, якія пішуць па-беларуску. Адным словам, карысная «палічка», якая мусіць быць у доме кожнага беларуса.
Рэсурс прапаноўвае кожнаму паўдзельнічаць у яго разьвіцьці, дасылаючы новыя кнігі, ці дадаючы ў каталёг тое, што яшчэ не апрацавана.
Беларускі кнігазбор
У працяг тэмы беларускамоўнай літаратуры ўзгадаем пра сайт «Беларускі кнігазбор». Шмат хто ведае сэрых кніг з такой назвай, у іх сабраныя лепшыя творы беларускіх пісьменьнікаў і паэтаў. Сайт «Беларускі кнігазбор» прапаноўвае пачытаць гэтыя кнігі тым, хто лепш успрымае інфармацыю з экрану, як з папяровых носьбітаў. Думаю, такі рэсурс будзе карысны студэнтам падчас вывучэньня беларускай літаратуры. Тут жа можна знайсьці інфармацыю пра кнігі, якія рыхтуюцца да выхаду ў сэрыі.
Беларуская мова з натхненьнем!
Менавіта такі слоган сустракае наведнікаў на галоўнай старонцы http://by.lang-study.com/. Сайт быў створаны як пляцоўка для студэнтаў, якія вучацца ствараць адукацыйныя рэсурсы на роднай мове. У яго распрацоўцы прымалі ўдзел выпускнікі філфаку БДУ розных гадоў. У выніку атрымаўся неблагі рэсурс, пра дапамозе якога можна ўдасканальваць мову ў розных напрамках. Слоўнік дапаможа вывучыць новыя словы (яны скампанаваныя па тэмах) і разабрацца з асаблівасьцямі іх ужываньня. Дыялёгі закліканыя адчуць размоўную мову, навучыцца задаваць пытаньні і камунікаваць па-беларуску. Тэксты дапамогуць пашырыць свой слоўнік. У дадатак ёсьць практыкаваньні, каб праверыць сябе і замацаваць веды.
Цікавага навучаньня!
Аляксандра Сержановіч для Радыё Свабода.
