Лінкі ўнівэрсальнага доступу

logo-print

У мястэчку Косава на Берасьцейшчыне беларусы і замежнікі адзначылі дзень нараджэньня Тадэвуша Касьцюшкі (1746–1817).

Некалькі дзясяткаў чалавек сабраліся ва ўрочышчы Мерачоўшчына ля Косава, дзе нарадзіўся Тадэвуш Касьцюшка і дзе аднавілі ягоную сядзібу.

Замежных дыпляматаў з краін, дзе жыў Тадэвуш Касьцюшка (ЗША, Польшчы, Швайцарыі, Расеі) сустракалі прадстаўнікі Івацэвіцкага райвыканкама і актывісты апазыцыйных партый.

Пасьля ўскладаньня вянкоў і кветак да мэмарыяльнага знаку Касьцюшку прысутныя накіраваліся ў сядзібу-музэй, дзе івацэвіцкія выканаўцы зайгралі мэлёдыі палянэзаў, складзеных Тадэвушам Касьцюшкам.

Сябры фонду Касьцюшкі з Польшчы ўбраліся ў шляхецкія строі часоў Касьцюшкі

Сябры фонду Касьцюшкі з Польшчы ўбраліся ў шляхецкія строі часоў Касьцюшкі

Пра свае ўражаньні ад наведваньня Свабодзе распавёў павераны ў справах ЗША ў Беларусі Скот Роланд:

«Гэта быў вялікі гонар для мяне. Я вельмі шмат даведаўся пра гэтага амэрыканскага героя — Касьцюшку. Быць тут, на яго радзіме, дзе ён вырас, бачыць гэта сваімі вачыма — дапамагае зразумець гэтага важнага чалавека. Я тут шмат даведаўся пра тое, што ён зрабіў, каб дапамагчы вызваліць рабоў у ЗША, забясьпечыць іх адукацыяй. Я гэтага раней ня ведаў. Таму, вядома, Касьцюшка — такі чалавек, які думаў на шмат гадоў наперад».

У часе ускладаньня кветак да мэмарыяльнага каменя Касьцюшку

У часе ускладаньня кветак да мэмарыяльнага каменя Касьцюшку

Скот Роланд прывёз музэю падарунак — уніформу кадэта вайсковай акадэміі Ўэст-Пойнт, адным з стваральнікаў якой быў Тадэвуш Касьцюшка. Разам з Скотам Роландам на ўрачыстасьць прыехаў і выпускнік акадэміі Ўэст-Пойнт, памочнік вайсковага аташэ ў Кіеве маёр Яніс Мікітц.

Часовы павераны ў справах ЗША ў Беларусі Скот Роланд (справа) і памочнік вайсковага аташэ ЗША ў Кіеве маёр Яніс Мікітц

Часовы павераны ў справах ЗША ў Беларусі Скот Роланд (справа) і памочнік вайсковага аташэ ЗША ў Кіеве маёр Яніс Мікітц

Ужо трэці год запар урачыстасьці з нагоды дня народзінаў Касьцюшкі наведвае і генэральны консул Расеі ў Берасьці Мікіта Маткоўскі. У інтэрвію Радыё Свабода спадар Маткоўскі распавёў, што Касьцюшка — гэта і расейская гісторыя:

«Гэта неверагодна цікавае месца. З аднаго боку, для мяне Касьцюшка — асоба неадназначная. Гэта чалавек, які даваў прысягу Расейскай імпэрыі і парушыў яе, узьняўшы паўстаньне. Але гэта гісторыя Расеі, гэта гісторыя Беларусі, бо гэты дом стаіць на тэрыторыі Беларусі. І з кнігі гісторыі нельга вырваць старонкі — яна будзе няпоўнай».

Генэральны консул Расеі ў Берасьці Мікіта Маткоўскі

Генэральны консул Расеі ў Берасьці Мікіта Маткоўскі

Імпрэза не абышлася і без палітычных абмеркаваньняў. У часе экскурсіі грамадзкі дзеяч з Кобрына Алесь Мех меў размову з дыпляматам ЗША Скотам Роландам. Спадар Мех узьняў перад часовым павераным пытаньне наяўнасьці ў Беларусі палітвязьняў, праінфармаваў яго пра нядаўнюю галадоўку Юрыя Рубцова. Скот Роланд распавёў Алесю Меху, што ЗША пасьлядоўна настойвае на неабходнасьці вызваленьня палітвязьняў у Беларусі. Амэрыканскі амбасадар перадаў асабістае вітаньне Юрыю Рубцову.

Інтэр’ер сядзібы-музэю Касьцюшкі

Інтэр’ер сядзібы-музэю Касьцюшкі

Пасьля экскурсіі і ад’езду дыпляматаў прадстаўнікі апазыцыі пачаставаліся гарачай «кашай касінераў» ад баранавіцкага прадпрымальніка Міколы Чарнавуса.

«Каша касінераў» ад баранавіцкага прадпрымальніка Міколы Чарнавуса

«Каша касінераў» ад баранавіцкага прадпрымальніка Міколы Чарнавуса

Бард Зьміцер Бартосік засьпяваў свае песьні, прысьвечаныя Тадэвушу Касьцюшку і ягонаму паўстаньню.

Сядзіба Тадэвуша Касьцюшкі ў Косаве

Сядзіба Тадэвуша Касьцюшкі ў Косаве

Паказаць камэнтары

XS
SM
MD
LG