Лінкі ўнівэрсальнага доступу

logo-print

«Корпус блёку ўжо ў нас, і мы яго ўжо нікому не аддамо», — інжынэр Беларускай АЭС


Першы энэргаблёк беларускай АЭС абяцаюць запусьціць у 2018 годзе.

Чыноўнікі, зьвязаныя зь беларускай атамнай электрастанцыяй, распавялі БЕЛТА пра вынікі году і далейшыя пляны.

Поўнамаштабны мантаж асноўнага абсталяваньня першага энэргаблёку Беларускай АЭС мае пачацца ў 2016 годзе, сьцьвярджае намесьнік міністра энэргетыкі Міхал Міхадзюк, работы ідуць па графіку. Таксама ў наступным годзе пачне паступаць абсталяваньне для другога энэргаблёку.

Першы энэргаблёк мяркуецца запусьціць у лістападе 2018 году, другі — у ліпені 2020-га, але, кажа галоўны інжынэр дзяржпрадпрыемства «Беларуская АЭС» Анатоль Бондар, розьніца ў часе паміж запускамі можа скараціцца. Тэмпы працы дазваляюць запусьціць другі энэргаблёк хутчэй, у бягучым годзе работы вяліся на пляцоўках абодвух блёкаў.

Корпус рэактару для першага энэргаблёку будзе дастаўлены на будаўнічую пляцоўку 24 сьнежня. Ён праехаў складаным шляхам: спачатку з валгадонскага «Атаммашу» аўтатранспартам да Цымлянскага вадасховішча на поўдні Расеі, адтуль да Вялікага Ноўгараду рачным шляхам, далей да Астраўца чыгункай. Корпус дастаўлены на беларуска-расейскую мяжу 18 сьнежня, афармленьне мае скончыцца каля 16:15. Ён важыць 330 тон, мае вышыню 13 мэтраў і дыямэтар 4,5 мэтры.

«Корпус ужо ў нас, і мы яго ўжо нікому не аддамо», — сказаў Бондар.

Паліва для рэактару будзе пастаўляць расейская кампанія ТВЭЛ, холдынг у складзе дзяржаўнага «Расатаму», — распавядае ён. Канкрэтныя тэрміны паставак пакуль не ўдакладняюцца.

Сумарны кошт абсталяваньня для АЭС ацэньваецца ў 3 млрд даляраў, пакуль абсталяваньня закуплена на 2,1 млрд даляраў.

Беларуская АЭС будуецца побач з гарадзкім пасёлкам Астравец у Гарадзенскай вобласьці. Мяркуецца, што яна будзе складацца з двух энэргаблёкаў сумарнай магутнасьцю 2400 МВт.

У Літве занепакоеныя блізкасьцю да Вільні станцыі зь нявыпрабаванымі раней ядзернымі рэактарамі.

Гендырэктар «Расатаму» Сяргей Кірыенка сёлета на сустрэчы з Аляксандрам Лукашэнкам заявіў, што «аналягаў гэтай станцыі няма пакуль у сьвеце, яна самая сучасная, самая бясьпечная». Але шэраг экспэртаў устурбаваны якраз тым, што расейскае абсталяваньне не прайшло належных выпрабаваньняў, іншыя кажуць, што не дасьледаваная належным чынам пляцоўка для будаўніцтва.

Паказаць камэнтары

XS
SM
MD
LG