Лінкі ўнівэрсальнага доступу

Дзень роднай мовы ў Пружанах адзначылі ў палацы


Тацьцяна Грыневіч (з гітарай) і Антаніна Хатэнка ў Пружанскім палацыку
Тацьцяна Грыневіч (з гітарай) і Антаніна Хатэнка ў Пружанскім палацыку

У музэі «Пружанскі палацык» адбылася імпрэза да ўсясьветнага Дня роднай мовы. У часе мерапрыемства ў Пружанах выступілі паэтка Антаніна Хатэнка і сьпявачка Тацьцяна Грыневіч.

На літаратурна-музычную сустрэчу ў гонар роднай мовы ў палацык прыйшлі каля 30 мясцовых жыхароў.

Антаніна Хатэнка пачытала свае вершы, паразважала пра мову, пра сувязь з продкамі і роднай зямлёй:

«Мова... Яна такая ў нас цяпер разьмежаваная — нехта так гаворыць, нехта так. Але хочам мы ці ня хочам, мова нас абдымае, бо мова вечная, яна ад зямлі і нябёсаў. Сёньняшнюю нашу сустрэчу мы эпіграфавалі радком Уладзімера Караткевіча — „Усё будзе вечна тваё, што ты аддаў“. Пакуль чалавек здатны аддаваць — ён шчасьлівы».

Пружанскі палацык ХІХ стагодзьдзя
Пружанскі палацык ХІХ стагодзьдзя

Спадарыня Хатэнка ў часе свайго выступу выказала шкадаваньне, што дагэтуль у беларусаў застаецца падзел на «каталікоў-палякаў і праваслаўных-рускіх».

Пружанская паэтка Ніна Дыдышка расказала, што сустрэча прымусіла задумацца яе пра свае карані:

«Анатаніна Хатэнка мне падабаецца сваёй харызмай, зь ёю можна глядзець у будучыню, але і азіраючыся на мінулае, на карані, якія мы маем. Сёньня мяне ўразіла яе думка пра рэлігійны падзел беларусаў. Я сама задумалася, бо мой бацька паходзіў са шляхты, і ў нашых мясьцінах такіх людзей называлі палякамі. І мне тады, у малыя гады, здавалася, што, мусіць, трэба быць палякам. Але бацька мой вельмі любіў музыку па-беларуску, слухаў і казаў, што няма лепшай музыкі за беларускую.»

Каля 30 чалавек прыйшлі на Дзень роднай мовы ў Пружанскі палацык
Каля 30 чалавек прыйшлі на Дзень роднай мовы ў Пружанскі палацык

Тацьцяна Грыневіч пасьпявала беларускія песьні, распавяла пра выданьне дыскаў зь вершамі клясычных і сучасных беларускіх паэтаў.

Завершылася сустрэча палянэзам Агінскага «Разьвітаньне з Радзімай» у выкананьні Тацьцяны Грыневіч.

Як сказаў Свабодзе дырэктар музэю «Пружанскі палацык» Юры Зялевіч, моўныя сустрэчы, прымеркаваныя да ўсясьветнага Дня роднай мовы, адбываюцца ў палацыку штогод:

«Сёньня — гэта творчая сустрэча з паэткай Анатанінай Хатэнкай і сьпявачкай Тацьцянай Грыневіч, летась у нас быў „спарынг“ паміж знаўцамі беларускай мовы. Я лічу, што такія імпрэзы павінны быць, і праводзіцца мусяць больш шырока. Ня толькі ў музэях, але і іншых установах культуры, школах. Трэба прыцягваць увагу да праблемаў мовы, бо яны сапраўды існуюць. Апроч таго, наша імпрэза прымеркаваная да пяцісотгодзьдзя — 500 гадоў таму Францыск Скарына распачаў беларускае кнігадрукаваньне. Зараз у нашым музэі адбываецца выстава беларускіх кніг ХХ стагодзьдзя».

Дырэктар музэю Юры Зялевіч уручае падарункі гасьцям Пружанскага палацыку
Дырэктар музэю Юры Зялевіч уручае падарункі гасьцям Пружанскага палацыку

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG